La Usc di Ladins

L ie stat na gran fertuna, pudëssen dì. Na bona man dal ciel che nosc luech de Urtijëi a te si plans, che vën nce numinei »la Bruscia«. Y iló iel unì fat su la Dlieja de Sant Antone. Che ie de na belëza stilistca y de architetura che fej cialé ca duc nosc seniëures, che ne n'ie nia mel ncantei da chësta nosta Dlieja storica. I ne ascuend niancanó si amirazion, ti l dijan nce ai patrons dla cëses ualche i sta, che giapa pona nce n cër' uedl positif n con' de n monumënt »da Dlieja« che nëus on scialdi suvënz nce mpue' bagatelisà y desmincià. No pa?
Nëus on ultimamënter nce abù la gran fertuna che nosc cunzitadin y persona da na gran erudizion storica y culturela, nosc prufessëur Edgar Moroder, à fat na tueda storica scialdi bona y cumpetënta. Na tueda n con' de chësta marueia tamesa nosc luech: da si stude iel pona unit ora n beliscimo liber che ie pona nce ruvà mpue' te duta la cëses. N gran gra a nosc prufessëur Edgar Moroder de Oswald de Trinadianesc. Sambën nce na rechia de cuer per la burta ntraunida, che chësc nosc cunzitadin y bon prufessëur ie unì a mancë te n colp, sciche ora de n ciel sarëinn.
Na cossa tla Dlieja de Sant Antone che ti mueia a trueps a Urtijëi, o a chël che l ne vën nia tan abadà, ie che a man drëta, dlongia la scultura de nosc Sant Antone fata dal scultëur Pauli Moroder da Lenert y pona depënta cun n bon penel da Max Stuflesser de Petlin, iel tacà, su per mur, bele da for incà, n beliscimo cheder de n beliscimo culëur ros dl lën y nce ndurà. Te chësc cheder iel scrit, cun n bel urnamënt cueciun linëus, n test de n grandiscimo crëidum y da na gran bona relazion cun nosc Ciel y sambën cun nosc Seniëur Idie. Chësta scrita à daniëura da n fé cun l mpië cëiresc. De chësc bel test éi ulù me tò la bria y nce l plajëi de l ciancé tl ladin gherdëina: »L cëir mpià à plu valor sce l vën cumpanià nce da vosta priera. Seniëur, chësc cëir che ie mpeie aciocheTu me debes lum te mi deficulteies y dezijions, che l sibe fuech, acioche Tu brujes te mé uni egoism, superbia y ledam; che l sibe na flama, acioche Tu sciaudes mi cuer y me nsënies a amé. Seniëur, ie ne poosse nia sté giut te Ti cësa, ie mpeie chësc cëir, y mpue' de mé nstës che ue Te duné. Judeme a purté inant mi priera tla ativiteies de uni di. Amen.«  (Oscar Prinoth dl Rezia, Urtijëi)