La Usc di Ladins

Chisc dis passei éi fat n doi iedesc bel plan la raida da plaza de dlieja nchin ju sun plaza de Sant Antone, ti cialan y cunscidran n pue' plu avisa i lëures che ie unic metui n vista n ucajion dla mostra "Biennale".
Canche fove japé, fova la delujion scialdi granda. Ie son n vedl artejan scultëur, che se à dat ju duta la vita cun scultures y l me à for sapù bel a ti cialé a mostres che vën fates ncantëur.
Dloncora pòssen udëi zeche de bel y nce de nuef, ma tlo pra la mostra a Urtijëi iel bën rie se udëi ora velch de bel. Chël che me desplej l plu de dut ie che chisc che à fat chisc lëures, vën duc ntitulei artisć y nce paiei aldò cun scioldi publics. À pa la man publica tan l muet (20.000 € Chemun de Urtijëi, 5.000 € Chemun de Sëlva, 2.300 € Chemun de S. Cristina, 1.500 € Chemun de Ciastel, 20.000 € Lia dl Turism, 200.000 € Provinzia y Region per de ndut 248.800 € de scioldi publics) o se lascions'a tan saurì tò per l nés da n valgun fulestieres che miena de vester chi sà chi?
A jì ite sun n valguni de chisc lëures metui ora, me nfidi a dì che ch'i trëi mudli de mauta sun plaza sot a dlieja ne ti dij a deguni nia y che chël che i à fac ne n'ie dessegur ënghe no n gran artist coche l vën fat ora.
Plu injù udons la doi figures de Adam y Eva. Da mé ora n spaventon! Cun ert àl bën puech da n fé. Ce cuineda!
Co possa pa l Chemun de Urtijëi sustenì zeche de n livel tan bas te si luech? Ma per fertuna iel nce trëi scultëures de Gherdëina che à fat pea y chëi lëures ie i miëures de duta la mostra.
Po' fóssel mo da numiné i sveies de lores y lëufs che n aud jan da Rusina ju. À pa chël da n fé zeche cun ert?
Per ne la tré nia massa n loch ulëssi la finé via tlo, speran che ti proscimi ani uniràl a s'l dé velch de miec che chëst ann, savan che on la fertuna de viver te n luech cun n bon livel de cultura y ert.

Herbert Moroder, Urtijëi