La Usc di Ladins

Ne n'iel pa nia scialdi n bel tier, n tier da ti cialé cun amirazion y gran respet? Y pona iel mo la situazion y l gran desplajëi che l n ie tan pueces de chësta blòta lores. Tan pueces che les manacia de murì ora! No pa? Y te chësta realtà nsci »ala zibla«, coche n pudëssa dì, cun chësc tier oml che permez ala cuantità di autri tieres ti bòsc, pòssen cun rejon dì che la lores ie na sort de »unicum«.
Te chësta situazion iel bën scialdi da muië canche n muessa audì tres duc i media che la jënt y la autoriteies, che ie alauta te nosta aministrazions provinzieles de Bulsan y de Trënt, ie n cuntat strënt y istituziunel per ulëi tò y tres chësta valguna lores che a vel' maniera ie mo bones de sëuraviver! Y chisc »gran« uemes dla politica uel ti fé la festa, y se studieia ora la metodologia per savëi avisa ulache les ie! Suvënz les ài nce sot a si cuntrol cun tecniches che ulon tlamé »tecnologiches«. Robes che sona mpue' da fantascienza, ma che cun paroles plu rëidles y nce »cristianes« fóssel da numiné y plu drët dì y definì nia autramënter che »barbares«!
No pa?
Coche contlujion de chësta mi pitla analisa senziera iel da pudëi y putruep da messëi dì che ultimamënter fova nosta autoriteies dla doi Provinzies autonomes tan inant y feter defin a una de ulëi ti fé la fin y stlupeté ju mo chësta valguna lores. Robes y nutizies tres nosc media nsci bën nfurmei che nes fajova scialdi mel ala urëdles y al cuer–diverda che la jënt ebe mo n cuer te nosc tëmp scialdi suvënz mpue' »pervers«!
Te chësta situazion de robes, de chëles che l se cruzia la gran politica alauta, iel mé mpo stat na drëta fertuna y da ti auzé l ciapel a n minìster che à lascià audì si parola, fajan a l savëi che chësta lores ne dassova nia unì mazeda dala tecnologia de nosc uemes dla politica dla doi provinzies, suvënz mpue' massa sapienc y dessegur nia sensibli.
L ie dessegur nce da speré tl aiut y te na iluminazion da lassù ju.  (Oscar Prinoth dl Rezia, Urtijëi)