Dezijions che vèrda al davegnir

Data

21 de setember 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Endèna chisc ultimes dis de fin de l'istà e de arvejinament a la litazions di comuns e del Comun General de Fascia, un di aspec che più me fèsc piajer l'é stat veder la gran partecipazion, te la desvaliva listes di desvalives schierament, de joegn de livel sozièl, con titoi de studie de ogne sort, con profescions ence dassen desvalives, con pecia esperienza politica, fora che vèlch un, ma con gran gaissa e gran voa de fèr, de se meter a la proa, de tor te man sie davegnir e chel de duta la val.
Tedant a chest chèder, na pruma reflescion che me vegn da fèr adaut e uzèr fora a duc, tel spezifich a nos jent de età, l'é chela de recognoscer e encorajèr la gaissa e la determinazion de chisc joegn. Te ic l'é de segur na scelta de basa, soraldut vedui i avenimenc climatics, sozio-sanitères e economics de chisc ultimes tempes e de chi che proprio i joegn l'é e sarà chi che maormenter n padesc anchecondì e tel davegnir. Chela, donca, de conscidrèr l stravardament del pianet sia priorità e de l dir a ousc forta al mond entriech e, dantdaldut, a sia comunanzes.
I merita donca de vegnir conscidré ti prozesc dezijionèi (Consees de Comun, Comun General, desvaliva sociazions e auter amò), a na vida da poder desfrutèr dassen sie sens de responsabilità, sia determinazion, sia voa de fèr.
Te na val che vif de turism, soraldut chel leà ai schi, no pel esser schivà chel che l'é dò a suzeder da n pec de egn. Bèsta jir sun Fedaa e vardèr te che condizion che l'é la reìna de la Dolomites, la Marmolèda (15 egn de vita i à ipotisà i glaciologs). L mudament climatich l'é ruà te noscia vita con la giama desteneta. Chisc joegn i lo à entenù e i à chierì de tirèr l'atenzion de nos gregn, jan te la piazes e te la strèdes e i ne à cridà de no jièr con sie davegnir.
Te chisc joegn e te sia voa de se meter a la proa l'é l'idea de desmostrèr sia intraprendenza tel creèr soluzions e proponetes per l davegnir, col dejiderie de saer semper de più e miec co trasformèr nosc e soraldut sie amà teritorie, te na val orientèda e empegnèda tel svilup 'sostegnibol' e de protezion vera de la mont, saan, descheche me sà de entener che vigni dezijion touta anché smaore o smendre l rai de azion per la generazions del davegnir de noscia val.
L'ambient de vita, la profescions e l'organisazion de duta noscia sozietà de anché probabilmenter no i sarà più doman, màscima ma no demò, a cajon di cambiaments climatics. La degradazion ambientèla e l cambiament climatich i piora ogne auter problem. Ge vel lurèr dalbon, coche vegn desmostrà da la intenzions e dai programes de chisc joegn, per na trasformazions sostegnibola de noscia val, saan che la crisa ambientala la và veduda e vivuda desche n'oportunità, per sperimentèr neva strèdes e neves orizonc.
Se per la Marmolèda ogne mudament l'é oramai tardif, podon aboncont didèr chisc joegn a tor dezijions che no fae desfantèr autra robes e valores de noscia amèda val.  (Floriano Bernard de Cechinol da Pera)

Galaria retrac