La Usc di Ladins

Chiche ie stat chisc dis sun Resciesa de viers de Bredles à dessegur pudù udëi i gran lëures de ngrandimënt dla streda. Tlo iel da udëi na gran pacher che se roncia inant te chësc beliscimo raion naturel per purté nce iló la »santa urbanisazion«, acioche la mudernisazion y l sfrutamënt posse jì inant y ruvé tosc sëura dut!!!
Na majera streda porta n majer trafich, de rodes, auti, tractores, camions y petonieres. L me vën dant che n ti fej bele streda ai proiec de furnadoies da Funes su, de ngrandimënc dla hitia de Bredles y chi sà cie mo. Deguna lerch al chiet y al salver ne dëssel plu ti resté.
Do chësta pandemia ne sarà dut nia plu sciche dant, unìvel dit. Mo piec vàla inant, ma mpede dsaré y cumedé su i fai fac, la pëten ju for mo deplù!
Fé na streda tla natura uel dì ti tò l'ana... L ie l scumenciamënt dla fin, fé stredes tl bosch y da mont su ie la metastases che se slergia ora tl salver, nscila iel tlo tl pitl drë' sciche tl gran bosch dl Amazonas. Stredes y furnadoies ie mé tlo per jì a tò zeche, no per ti purté velch.
Ala fin perdons duc!
Cun na drëta mueia Ve saluda  (Livio Comploi, Urtijëi)