La Usc di Ladins

La doi gran manifestazions d'ert da d'instà a Urtijëi ie finedes o fina tosc via, y l me sà che les fej pert urmei dl luech de Urtijëi sciche la sajons. Ie rate che l ne n'ie degun luech dla Elpes ulache les passenëssa ite miec che tlo da nëus. Perchël na lauda a duc che lëura n chësc cont dovia.
Purempò me sàl che n muessa dì n doi cosses n cont dla doi manifestazions, che, do mi minonga, ne va nia massa bën.
Da una na pert ons l'Unika, na lia de artejans/artisć che se proa dassënn dut l ann, cun idealism, tl tëmp liede, zënza abadé al'ëures y ai dis, per realisé ala fin na manifestazion de gran prestige coche chëst ann cun la nuet longia acumpanieda da Mauro Corona, Andrea Baffoni y Georg Malfertheiner, che à realisà na sëira che n pudëssa prejenté nce a Roma o Berlin zënza fé burta figura, ruvan ite cun si logo »Unika« per n trëi ëura, l'ena do da sëira, te Rai Tre tla miëura ëures de program dala nuef da sëira. Dut chësc, coche dit dessëura, cun mpëni persunel de duta la lia cun families y per dut chësc cun n sustëni economich provinziel scialdi pitl.
Dal'autra pert ons na lia privata che mët a jì la Bienela, che cunescion dai ani, y che ne fej chësc lëur nia mé per idealism, ma che à abù l snait de se damandé per chëst ann dala Provinzia n cuntribut de 375.000 €. Tant che i à giapà ne sàn mo nia avisa, ma plu o manco sàn de nia na pitla soma. Ie rate che tlo iel dovia n auter idealism. Belau debant sciche dessëura ne unissa te chësc cajo la manifestazion bonamënter nia a s'l dé.
N cont dla cualità dla espusizion y dla opres se lascëssel rujené giut. Sce penson che l pez de majera mpurtanza ie na copia de n lëur dl 1800 de nosc Museum de Gherdëina, fat do a mascin bonamënter scialdi grant y prejentà sciche esprescion de ert moderna, sun nosta plaza, pona ne n'ons nia plu drë de rujené inant giut de dut l rest, ulache n pudëssa rujené giut.
La minonga de Mauro Corona y de Andrea Baffoni n cont dl'ert moderna a livel aut ie stata scialdi negativa. Ëi à dit n ch'la »sëira longia« dan a na sala de jënt danter l auter che tl ambient dl'ert de livel aut, vàla dantaldut de scioldi y »business«. L'ert coche i idealisć miena, ne n'à nia massa mpurtanza. Chësc dit da doi persones che, n cont dl'ert, ie scialdi renumedes.
Per la finé via n curt:
ie rate che tl daunì messerà n Chemun mpenià tla cultura tò dezijions per mëter la cosses n cont de Unika y Bienela sun n livel plu rëidl, ulache duc po' avëi si sudesfazions a lauré inant.  (Herbert Prinoth, Urtijëi)