La Usc di Ladins

N cont dla Bienela Gherdëina, che ie tan unida criticheda da nosc zitadins, ulëssi nce dì la mia. L semea che l'ert cuntemporana feje ert a pië pe te nosta valeda tan nraviseda tl artejanat y tl'ert tlassica. Savon bën che l'ert cuntemporana ie ria da capì o che n muessa se tò dl'aurela de se dé ju cun la tematiches y i pensieres che la porta. Ne ulësse ënghenó dì che dut chël che ie »modern« ie bel, savon che te chësc mond iel nce saurì se ascuender coche artist. Lauré te na maniera moderna ne n'ie defin nia saurì coche truep »artisć« miena. Lauré »modern« messëssa vester n madurì che porta zeche de nuef y de nteressant. A ruvé de reviers ala Bienela ulëssi dì che ie azeteie bën sce a zachei ne ti scusa nia l'opres che ie unides metudes ora y che l vën fat na critica. Chël uel dì che n ti à cialà al'opres y à fat na cunscidrazion, positiva o negativa che la sibe.
Nstadì sons jit su per l luech y l'opres che ie unides metudes ora me à sapudes beles. Les ti dà al luech na mprescion curiëusa. N messëssa mefun se tò dl'aure­la de se dé ju cun la cossa, sambën chël stënten danz a fé.
Son aposta jit a ti cialé mo n iede ala scultures dl artist Hans Josephsohn, che i me à tan strità ju che les ie beles. Bele l prim iede che les é ududes me àles plajù. Y chëst iede me à si forza mo plu tucà. Do mi ntënder iel dut laite cie che n'opra moderna (l artist ie pu nasciù tl 1920) muessa avëi. L semea che ne son nia boni de udëi la reduzion dla figura. Ulësse paredlé Josephsohn cun l gran artist cunesciù Francis Bacon, che à ënghe fat na reduzion y na decumposizion dla figura y che ne pudon propi nia mëter n descuscion.  (Egon Digon, Runcadic)