La Usc di Ladins

Un de chisc dis, jon da doman adora por le ju de Frara cun tëmp da nëi, m'él capité da osservé na situaziun che ne vá nia bun. Sön strada dala pert dla Val Badia êl bun 5 cm de nëi y auti che ne jô nia plü inant o che ê rová fora de strada. Sambëgn m'ái ponsé che le sorvisc dles strades n'â nia pordejü y che al foss na situaziun fora dl normal por öna dles prömes nëis dl altonn.
Canche i sun indere rové sön Ju de Frara, ái odü cun gran morvëia che la strada dala pert de Gherdëna ê bele desparada. I á tut sö infor­maziuns y al m'é gnü referí da plü perts che al n'é nia le pröm iade che al sozed. Da ti fá n complimënt al sorvisc dala pert de Gherdëna, dl ater vers na plüra por le sorvisc dala pert dla Val Badia. Le Ju de Frara, sciöche strada de coliamënt danter Badia y Gherdëna, tocass bëgn da gní gestida unitariamënter y desparada por tëmp da intrames les perts.
I me augüri che la gestiun dl Ju de Frara vëgnes da sëgn inant gestida unitariamënter, por la segurëza de düc chi che se mët sön strada.  (Albert Pizzinini, Ladins Dolomites)