L batadù da d'autonn sun Chemun

Data

03 de november 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Uni cin' ani puech dan che se arleva l autonn, vën te Chemun a se l dé l gran batadù per l tronn. Jal Terrazza ntan chisc ani trueps se à alenà a carté, ntan che d'autri, al banco, mé dla chertes stajova a bruntlé.
Y cartà iel unit jal Ladinia y monce tla Cësa di Ladins, vel' un fajan »bluffen«, vel' auter jugan bel fin. Ma l gran batadù de Chemun, chël che conta, de chël n iel mé un y per chël se pieta trueps, sciche la mosces sun l chetum.
Duc a detlaré bele danora che gën ulëssi carté pea, ma ntant n valguna chertes doples ascuendi tla brea. Ntant vëniel scumencià y bel riesc l vedl stratega, al jëunn che pënsa a puntin uelel ti tò Lega.
Nscila bel riesc, mo dan che l vën dit su, pieta l vedl trëi, che monce l zot de rëur se fir ti ciavëi! »Ma co fej pa chisc a pité trëi, sce on pu nëus sibe dërta che bon?«, se mpënsa l jëunn, aspitan mo mpue, dan tò la dezijion... La landa dal'udleda de dlacia ti cëla via al cumpani, bën mpue grama. »Damanda pu –Bessere– o resion pu de se carté via la sama!« Ma la vedla bolp à bele venciù passa 600 nules te si cariera da cartadëur, l se sënt tan segur, che monce cun l Weli blot se sëntel l miëur.
Purempò baziléiel dedite: l cunësc si chertes, ma nia chëles dl averser, ... l se lecorda mo avisa dla lezion dan cin' ani, canche l ova perdù contra l comisser. I »trëi« ie pitei: śën vàla de tré tres, cun l puni sun mëisa mo de bater, ma l jëunn cun si trieva, ti cëla ti uedli y ... pieta cater.
La partida scumëncia y duc sà che al partner ti làscen for via l segondo las, ma la landa à mé n tel trionf... y chël mo bas. Panich ti liejen tl mus, la bolp se pënsa: »So, śën iela aus!« Y la landa, despereda, proa mo a pité n »Schlagumtausch«.
»Sce cartëis nscila«, ti dij l berba al jëunn, »pona ne ëis nianca plu drë de cherdé (su)!« Y l jëunn lessù: »Fais'a bën tla situazion de pudëi pité?« – »70 ani che vencion l batadù de Chemun, vo ne sëis stac rëidli ntan ch'sc turnoi!« – »Pu sce ne assais nia pità tan da uems... n fóssel almanco scrit doi.«
La landa ti cëla śën stort al partner: »Pu ne oves'a nia capì cie che jiva, tu ciavon?« Y l berba: »Pu ie ove bën almanco l ladron!« – »Nosta tatica ne à nia butà«, vëijela ite, »ie rate che pudon propi levé su y dì ciau... jon via dai ujins a nes cunselé cun l Mau Mau.«
Y do uni carteda, te chemun o te ustaria, se ascuend for na moral, unfat sce l va rë de balle o de fueia l ciaval. Chiche ie massa segur, vën svercià sciche Oswald dal colp dla slaidra y la conta da paië... ie na bela snaidra.  (Ivan Senoner Fudlé, Urtijëi)

Galaria retrac