La Jonta ne n'ie nia mé n calcul

Data

06 de november 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Resposta a Egon Bernardi. Te si lëtra, publicheda chëst'ena passeda te La Usc, ti iel unì trat dant ala Lista Unica de ne avëi nia respetà la ulentà di litadëures, spiegan che, fajan l calcul matematich, ëssa la LU messù fé coalizion cun la SVP y nia cun la Lega.
Danora ulëssi lecurdé che la Jonta, a desferënzia dl Cunsëi, ne vën normalmënter nia metuda adum n pruporzion ala stimes. Rejon chësta ciuldì che suvënz n partit che à na maiuranza assoluta, nce sce mé de puech, va da sëul te Jonta zënza fé coalizion. L ambolt à dantaldut la respunsabltà y l duvier de mëter adum na Jonta che possa lauré te na maniera sarëina y purté inant i proiec, y chël uel dì che n muessa tenì cont de plu aspec per la mëter adum. Purté dut mé a n calcul de pruporzion ne n'ie per chësta rejons nia drët y na maniera massa scëmpla de udëi la cosses.
Y sce cialon plu avisa coche la ie jita, muessen, semea, for inò dé da lecurdé che la LU ti à pità ala SVP sibe l 4 a 2, che n 3, 2, 1 danter LU, SVP y Lega, prupostes che ëssa dessegur respetà la ulentà di zitadins. Chësta prupostes ie unides refudedes dala SVP, che se pertendova categoricamënter l 3 a 3 (che ëssa purtà a na situazion de patt) zënza nianca no ulëi rujené danora dl program o di proiec che n ulëssa purté inant. Lecurdon coche Ewald Moroder ti à respundù al ambolt ala fin dla senteda de coalizion danter LU y SVP sun la pruposta de Tobia Moroder de se ancunté mo n iede: »Sce te restes sun l 4 a 2 ne n'es nianca drë' de nes cherdé ite, iló bàstel che te chërdes su Lara y desdijes!« (purtà dant dal ambolt y cunfermà da Lara Moroder ntan la prima senteda de cunsëi, da audì tl audio-file dal menut 1:20,00 inant).
N capësc nsci che sce n ëssa messù lauré te n tel tlima de lëur cun na coalizion de 3 a 3 (situazion de »stallo«) fóssel deventà dastramp rie, sce nia mpuscibl, a purté inant l lëur de Jonta. Per chësta rejon ti dé al ambolt la gauja che l ne n'ie nia unit a s'l dé na coalizion cun la SVP o ti tré dant che ël ne respetea nia la stimes dla jënt, ne curespuend nia ala realtà y ne n'ie nia drët te si cunfronc. Plu che auter messës'a bonamënter la SVP se damandé sce, ne azetan nia l 4 a 2, ti àla fat n gran tort a si litadëures.
»On for audì che Tobia dëssa vester na persona che cëla de ciafië cun duc. Ma coche l à fat chëst iede, .... , chël nes sà l colmo«, liejen tla lëtra de Egon Bernardi. Ma coche é purtà dant tlo, muessen jì ite plu sot tla cuestion per capì l ciuldì de cërta dezijions y a ciafië cun duc, coche Tobia ulëssa dessegur, ne n'ie nia saurì canche chësta ulentà vën mé da una na pert.
Per finé via mo n pensier n con' dla anedota dl restaurant:
Sce ie vede a maië te n restaurant y cun 10,00 euro giapi na jopa cun doi bales, pona ne possi nia pertënder de n giapé de vera forza trëi. L pudëssa vester che sce damande cun maniera nen giapi mo una SCINCHEDA. Ma do che é bruntlà ju giut alalongia tan stlet che n maia, saràl rie unì a una.  (Moritz Peristi, Urtijëi)

Galaria retrac