La Usc di Ladins

Mi pensier coche oma, fëna de n maester de schi y zumpradëur, maestra de scola, (mprenditëura) fitamajons y cunseliera de chemun.
L'ultima nuet ne sons nia stata bona de durmì, davia che messove pensé do ala situazion de crisa a chëla che la sozietà muessa al mumënt ti jì permez. Sce pënse de reviers nes desmostra la storia de Gherdëina che la persones da snait y da de gran ideai y vijions, che à vivù tlo da nëus, nes à purta al bënsté finanziel ma nce a chël soziel.
L taca plu o manco dut adum. Nosc besavons y nëinesc ova na gran ulentà de se svilupé y de costruì n daunì segur per la generazions che vën do.
Ora de nia vëniel adalerch n virus y nes tol chësta segurëza y nes fej nce tëma. Ie é ënghe, muesse dì, mpue de tëma; nia dal virus nstës ma plu che auter dala situazions ncherscëules che vën a s'l dé danter nëus persones.
Persones che dà gaujes y che mostra cun l dëit sun politica o istituzions. N pert me suzédel nce a mi, de ti tré dant a vel' un cumpurtamënc nia adatei te n tel mumënt.
Perdrët iel cunesciù che te mumënc de crisa vën la persona criativa. Chël che on povester desmincià ti ultimi ani, ajache la nes jiva pu bona y ne an nia de bujën de ideies ora de mesura per sëuraviver. Ma śën rati iela inò tan inant. Per mantenì chël che nosc antenac à fat su adròven śën inò persones cun ideai, cun ideies y prupostes o critiches costrutives, y cun na ulentà de lauré deberieda danter persones cun capaziteies ti ciamps plu desferënc. Tl passà iesen stai boni de costruì na rë (Netzwerk) che ie da nvidië, ma che son mé boni de mantenì sce lauron inant deberieda, zënza mustré l dëit sun politica, istituzions o categuries, ti dajan la gauja de dut, ma purtan ideies, se paran ite la manies y judan ulache la va, coche nosc antenac ova fat! La politica ie rapresentanza dla populazion y nia l nemich, sce n ti va permez cun chël pensier, devënta dut plu tler.
Mé duc deberieda y nia un contra l auter sarons boni de vëncer, de ti vester a chësta crisa!  (Sara Stuflesser, Urtijëi)