N gran »bravo« a Ellis Kasslatter y a Fabian Rabanser.
Chisc ultimi ani éi na urëdla scialdi sensibla y é scutà su dassënn coche l vën rujenà dai mëndri al didancuei, y la situazion me ova sapuda scialdi melciafieda, per no dì stleta, n con' dl rujené nosc gherdëina, ajache audive la gran pert de chisc mëndri che rujenova tudësch. De chësc fat bën plutosc da muië, ovi scrit te La Usc di Ladins, che dijova tl titul che la situazion ie n chësc cont scialdi »melciafieda«. Tl medem scrit ne n'éi pona nce nia arjumà de dì che l gherdëina univa per fertuna mantenì dassënn te nosc artejanat, y nce da cërta jënt de livel y de bona cultura, che à da n fé a livel aut cun i media, la scoles y n.i. Do chësta premissa
generela y defin vëira, fovi pona jit via a rujené de nosc Radio Gherdëina, trajan ca y laudan dassënn Fabian Rabanser. De si talënt y bona cualità uei dantaldut tré ca mo n iede si trasmiscion dl sport, che ie uni lunesc dala cinch domesdì y ulache ël schiva for de tò ca l verb tudësch »spilné«, che vën cër' tëut ca da duta la jënt, ma mpede chël bën sistematicamënter y for l verb »jughé« dala parola ladina »juech«. Fabian tol ca chësc bel verb ladin bel tresora, zënza mei dì »spilné«, coche n generel feter duta la jënt. No pa? Nsci uei mo n iede ti fé na lauda senziera al bon Fabian Rabanser per si lezitënza y mpëni de rujené n bel ladin. L bon cajo à ulù che é, dan doi enes urmei, urtà a scuté su, for te Radio Gherdëina, Ellis Kasslatter n relazion al gran turnoi de tennis che ie stat ora a Runcadic. Tlo ne n'éi nia fat ert a audì che la deletëula Ellis à rujenà te n gherdëina da pudëi y messëi ti auzé l ciapel y da pudëi ti dì n gran »bravo« cun paroles ora de nosta sensibltà linguistica ladina y: »Ellis tu ies pra la ntervista n cont dl turnoi de tennis per passa n cher' d'ëura stata de na cualità linguistica veramënter de marueia, ti rujeneda fova scialdi sapuda y bela da scuté su! Te ies stata scialdi bona tl adurvé nosc ladin de Gherdëina tl radio, dan duta la jënt che scota su gën n tel argumënt de atualità sportiva.«
Perchël me vëniel defin spontann de stlù ju chësc articul cun doi scialdi de gran »bravo«, n bravo sterch y sentì a Fabian Rabanser y n bravo ënghe tan sterch y sentì ala scialdi talenteda Ellis Kasslatter, »fia d'ert« pudëssen tlo junté pro. No pa?
(Oscar Prinoth dl Rezia, Urtijëi) 
