La Usc di Ladins

Te n tëmp de crisa sciöche chël che i viun sëgn, vál ciamó plü debojëgn da desfarenzié la bona dala stleta politica. Na bona politica é chëra che se tol sö la inciaria de s'orienté tla direziun de n mioramënt sozial, cultural, economich, ambiental; la stleta indere ti vá ma do al consëns y é tres tla campagna litala, olache impormëte cunta deplü che fá.
Ci che an pó osservé atualmën­ter é che la stleta politica é chëra che tira dant. Impormetüdes de vigni vers, a livel nazional, regional, provinzial, comunal, idees de co mëte en pratica döt fala sovënz. Te chësta fasa dl Covid podunse assistí ala »show« dla stleta politica, danter stlü döt, daurí sö döt, gonot zënza avëi la minima idea dles conseguënzes, ala chirida dl consëns asvelt. Da jí inant insciö saltarunse tosc cuntra n mür.
Gestí le recovery fund cun na te' politica portará valgügn a s'arichí, mo ne sará nia bun da ti dé na na dërta óta ala politica europea. Na óta tambëgn soziala, culturala, ambientala y de conseguënza ince economica. Sëgn él la ocajiun, mo i me tëmi che ara gnará injomada ia. Al vëgn dit che chi che vá inant tla politica é chi che ne foss nia bogn da jí inant tl ciamp dl laur. Al é da s'auguré che ara ne sides nia avisa insciö; che al se mëtes a desposiziun y che al vëgnes spo lité porsones che ais realmënter cualités. Da ci che an vëiga indere ultimamënter, él döt le contrar y plü che dal Covid, messunse se temëi da che y sciöche le Covid gnará gestí.  (Albert Pizzinini, La Ila, Ladins Dolomites)