Manifestazions atuales speziales

Data

13 de dezember 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 13 de dezember
Conzert d'Advënt a Rina
Melodies y cianties nadalines en domënia ai 22 de dezëmber, ince por recordé Iaco Ferdigg
Le Cor di Ëi »Col dla Vedla« da Rina mët da jí en domënia ai 22 de dezëmber dales 16:00 n conzert d'Advënt, te dlijia da Rina. Titul dl conzert é »Te chiriun« y al sará da aldí le Cor de Dlijia da Rina, n grup de stromënc dla Musiga da Rina, le Cor di Ëi y Eduard Huber da Peraforada cun i orghi da man. Le ploan siur Paul Campei portará dant pinsiers d'Advënt. Le conzert vëgn tigní ince en recordanza de Iaco Ferdigg, gnü a mancé chësta aisciöda te na desgrazia. Düc é bel inviá da gní al conzert por recordé y por s'arjigné ca al Nadé. I ves aspetun.

Aspité l Nadel te Tublà da Nives
Cunzert dl Evi Mair Quartett featuring Georg Malfertheiner
Te Tublà da Nives te Sëlva iel da audì ncuei vënderdi ai 13 de dezëmber 2019 n cunzert da Nadel cun l Evi Mair Quartett featuring Georg Malfertheiner. L vën lascià audì cianties tlassiches da Nadel y la ciantarina Evi Mair unirà cumpanieda da musizisć cunesciui de nosta provinzia coche Michele Giro (tlavier), Roman Hinteregger (bateria), Roberto Zecchinelli (bas); ghest speziel sarà l vibrafonist Georg Malfertheiner de Urtijëi.
L cunzert scu­mën­­cia dala 20:00. La ntreda ie debant.

»set«
Mostra de Federico Lanaro te Tublà da Nives
Federico Lanaro (Rurëi TN, 1979) se à laureà tl 2004 tla »Accademia di Belle Arti« de Bologna. Si opres, dala pitures ala scultures nchin via ala nstalazions, ie caraterisedes da tematiches trasverseles y da n nomadism linguistich che respidlea si esperienza persunela dl mond ntëur ël ite.
Tla mostra »set«, cunzepida per l Zënter culturel Tublà da Nives de Sëlva, prejënta Federico Lanaro na lingia de pitures y nstalazions che uel reprejenté reflescions sun l juech, ntendù nia tan coche forma de fé damat, ma bën tl'azion chitamënter esplujiva dla ntuizion che mira ala sudesfazion y al bënsté nteletif.
La giaurida sarà n mierculdi ai 18 de dezëmber dala 20:00; la ntroduzion unirà fata da Camilla Nacci dl Studio d'Arte Raffaelli de Trënt. La mostra resta davierta nchin ai 12 de jené 2020, dala 10:00 ala 12:00 y dala 15:00 ala 19:00. Ai 24 y ai 31 de dezëmber iela stluta.

Dla vita te Gherdëina (1800-1900)
L liber »Flinke Schnitzer, arme Witwen, freche Rodler« de Sabine Piazza vën prejentà n lunesc ai 16.12. dala 18:00 tla sala dla mostres tla Cësa de Cultura a Urtijëi
L'Aministrazion dl chemun de Urtijëi nvieia de cuer ala prejentazion dl liber dla storica Sabine Piazza, che ie unit a s'le dé nce cun l sustëni dl Chemun. L se trata de na publicazion che ie na abineda di documënc plu nteressanc ora dl archif de chemun, scric tan che duc dan l 1900.
N lunesc dala 6 da sëira dajerà la autëura Sabine Piazza vel' stlarimënt n cont de chësta publicazion nueva y l ambolt Tobia Moroder, la vizeambolta Lara Moroder y l assessëur Ivan Senoner purterà si salut.

Christmas on Ice 2019
N vënderdi ai 27.12.2019 dala 21:00 tl stadio Pranives de Sëlva
Cun Daniel Grassl y Carolina Kostner che menerà tres la sëira y sarà la »nona« dla manfestazion.
L Eisclub Gherdëina nvieia duc de cuer a chësta bela show de jadiné cun de gran atlec naziunei y atlec dl Eisclub.
Do la manifestazion puderàn fé fotos y autograms cun Carolina Kostner!
Chertes danora giàpen da cumpré tla Lies dl Turism de Sëlva, S. Cristina o Urtijëi o tla butëiga Nero Fluido a Urtijëi.
Chertes online sot a https://shop.valgardena.it/it/ticketing
Per nfurmazions n con' dl Eisclub pudëis jì sun la plata internet nueva www.eisclubgardena.com.

»MEJES« Memories de na cuntreda: Mostra y liber
Dal tëmp d'Avënt inant ie la mostra davierta plu giut
Dal merdi ala dumënia, dala 15:00 ala 18:00, de sada y dumënia nce danmesdì dala 10:00 ala 12:30.
Descedé ora nteres y ntujiasmé per la belëza y l valor di mejes storics: chësc ie l travert che l Museum Gherdëina se à metù dant cun la mostra »Mejes–La memoria de na cuntreda« tla Cësa de Cultura a Urtijëi.
Sëuraprò vëniel pità na prumozion per l liber »Mejes de Gherdëina« cun fotografies de marueia de 71 mejes storics te duta Gherdëina, fates dal fotograf Václav Šedý, n atlas che juda a nes urienté tla cultura architetonica y da paur che à per cënc de ani caraterisà la storia dla valeda.
Info: www.museumgherdeina.it, tel. 0471 797554

Sommelier sön pista
Do le gran suzes di ultims inverns, vëgnel metü da jí ince en chësc invern sön les pistes dl'Alta Badia l'iniziativa »Sommelier sön pista«
La iniziativa valorisëia y fej conësce i mius vins de Südtirol. Indöt vëgnel metü da jí sis apuntamënc söl program ai 17 de dezëmber, ai 14 y 28 de jená, ai 11 de forá y ai 3 y 10 de merz. An s'incunta dales 13:30 por jí cun i schi tl raiun dai schi dl'Alta Badia acompagná da n maester de schi, che dará ince val' consëi sön la tecnica dl jí cun i schi. Tratan le domisdé storjon pro te döes üties che tol pert al'iniziativa, olache al gnará ciarcé i mius vins de Südtirol adöm cun n sommelier. Le sommelier spligará les carateristiches di vins che vëgn ciarciá. La manifestaziun vëgn metüda da jí da Alta Badia Brand en colaboraziun cun le Consorz di Vins de Südtirol y l'Assoziaziun di Sommelier de Südtirol. Por tó pert mësson se scrí ite pro un di ofizi turistics dl'Alta Badia al prisc de 30,00€ a porsona.