Manifestazions atuales speziales

Data

20 de dezember 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 20 de dezember
Giaurida dl Museum Gherdëina ntan Nadel
L Museum tën daviertes si portes plu giut nchin ai 6 de jené
La chiena de Gherdëina cun duta si roba da fé damat y la criples da Nadel zipledes te Gherdëina dal 18ejim nchin al 19ejim secul, a chësta mostres y a mo truep d'auter pòssen jì a ti cialé tl Museum Gherdëina tla Cësa di Ladins: uni di dala 10:00-12:00 y 14:00-18:00.
»Mejes de Gherdëina – La memoria de na cuntreda«, chësta mostra tla Cësa de Cultura a Urtijëi ie davierta da merdi nchin dumënia dala 15:00-18:00 y de sada y dumënia nce danmesdì dala 10:00-12.30.
Dsaredes resta la mosta y l Museum ai 23, 24, 31 de dezëmber y ai 1. de jené.

Christmas on Ice 2019
N vënderdi ai 27.12.2019 dala 21:00 tl stadio Pranives de Sëlva
Cun Daniel Grassl y Carolina Kostner che menerà tres la sëira y sarà la »nona« dla manifestazion.
L Eisclub Gherdëina nvieia duc de cuer a chësta bela show de jadiné cun de gran atlec naziunei y atlec dl Eisclub.
Do la manifestazion puderàn fé fotos y autograms cun Carolina Kostner!
Chertes danora giàpen da cumpré tla Lies dl Turism de Sëlva, S. Cristina o Urtijëi o tla butëiga Nero Fluido a Urtijëi.
Chertes online sot a https://shop.valgardena.it/it/ticketing.
Per nfurmazions n con' dl Eisclub pudëis jì sun la plata internet nueva www.eisclubgardena.com.

»Oltre ogni soglia«
Mostra y prejentazion dla monografia nueva dl artist Josef Kostner
Ncuei vënderdi ai 20 de dezëmber 2019, dala 6 da sëira, tl Palaz Probizer a Isera daujin a Rurëi/Rovereto.
Duc ie nviei de cuer ala prejentazion l liber nuef dl artist Josef Kostner (1933-2017) y ala giaurida dla mostra de scultures y dessënies dl artist de Urtijëi.
La mostra ie unida cureda da Mario Cossali y Remo Forchini y sarà da udëi nchin ai 22 de fauré, da merdi nchin vënderdi dala 16:00 ala 20:00 y de sada y dumënia dala 10:00 ala 12:00 y dala 16:00 ala 20:00.
Cherdan su danora l 339 2253754 pòssen nce apusté n auter di o orar per jì a ti cialé ala mostra.

Le spirit dl Nadé
»Sonun y ciantun deboriada«. Conzert dla Müjiga de Badia y cors di jogn, en sabeda ai 28 de dezëmber a Badia
La Müjiga de Badia adöm cun i cors di jogn dla Val Badia (Kyrios, Mosaic, ProVoXis y AnterVoisis) á le plajëi da invié düc i amanc y apascioná dla musiga a so conzert da Nadé, en sabeda ai 28 de dezëmber dales 21:00 tla dlijia de Badia.
Al sará da aldí n program desvalí. Do n toch de introduziun da pert dla musiga, jará le cor inant por se uní adöm ala musiga y porté dant n valgönes composiziuns deboriada. I Ves aspetun.

San Salvester y Nanü tl'Alta Badia
Deplü é les manifestaziuns por saludé l'ann 2019 y ti dé le bëgngnü al 2020
Tl'Alta Badia mët man les manifestaziuns por saludé chësc ann ai 30 de dezëmber.
A Calfosch él la scora de schi y i stödafüch che organisëia dales 17:00 na festa cun estraziun di pesć y n rait a val cun i chentli. Ince a San Ciascian vëgnel metü da jí dui raic a val cun i chentli: pro la pista »Armentarola« dales 17:00 cun la scora de schi »Dolomites« y sön la pista »Piz Sorega A« dales 18:00 adöm cun la scora de schi da San Ciascian. A La Ila él la scora de schi che organisëia la Happy New Year Show, dales 21:00 sön la pista Doninz.
San Salvester
Ai 31.12. podarán a Badia tó pert al rait a val cun i chentli, che pëia ia dales 17:45 sön la pista »La Crusc«. La nöt de San Salvester podarán spo festejé dales 22:30 inant sön deplü plazes di paisc: a San Ciascian él le grup »Die Söhne Tirols« che sona, a La Ila pón ascuté sö la band »Mamalover« tla plaza dan l'ofize turistich, y a Corvara sarál pro le marcé da Nadé musiga y devertimënt cun Dj Simon. Püch dan mesanöt gnarál cumpedé düc adöm i ultims secunc dl 2019 te na sort de countdown, denanco festejé l'ann nü y se fá les mius aodanzes.
Nanü a Corvara
Le paisc da Corvara ti dá le bëgngnü al Ann Nü cun na festa ai 01.01.2020 dales 21:00 sön la pista »Col Alto«. La Scora dai Schi da Corvara-Ladinia organisëia n rait a val cun i chentli. Dedô podará i spetadus ciaré pro ai jors cun le parapënd y n spetacul de proieziuns de löms y imajes tl scür dla sëra.

SunRisa – Cui schi pro le lové dl sorëdl
En ocajiun dles gares de Copa dl Monn sön la pista Gran Risa a La Ila vëgnel organisé por le pröm iade, le lönesc ai 23 de dezëmber, le SunRisa
En chësc de deura i implanc portamunt tl raiun dai schi anter La Ila, Corvara y San Ciascian bele dales 7:15, por che i amanc di schi pois se gode le lové dl sorëdl y les pistes arjignades ca tratan la nöt. I partezipanc á la poscibilité da storje pro te cin' üties dl raiun dai schi, olache al vëgn pité n gosté sann y cun produc locai, metü adöm dal dr. Iader Fabbri, y che contëgn düc i ingrediënc por mëte man le de cun n'alimentaziun dërta. Por tó pert ala manifestaziun n'ól ester degüna prenotaziun, al basta avëi na cherta da jí cun i schi, che an pó ince cumpré en chël de pro i ofizi skipass da La Ila, San Ciascian y pro l'implant dl Col Alt. Do n bel de sön i schi podarán tó per al slalom paralel de Copa dl Monn, che mët man dales 15:00 cun les cualificaziuns.

Nadé sön la dlacia
»Christmas on Ice«: en domënia ai 29 de dezëmber podarán tó pert a n spetacul de jadiné artistich tl stade dla dlacia a Corvara
Chësta sëra podarán odëi i atlec y atletes jogn dl Ice Club Alta Badia y les »Ice Angels«, mo ince n valgügn jadinadus taliagn. Anter chisc sarál la jadinadëssa Ester Schwarz, le campiun talian junior Gabriele Frangipani, le pér de jadiné artistich y campiuns taliagn Manuel Piazza y Alyssa Montan, la campionëssa junior Ginevra Negrello, le grup de jadiné sincronisé »Ice on Fire« sciöche ince le jadinadú y campiun talian da Südtirol Daniel Grassl. Le spetacul é en domënia ai 29 de dezëmber y mët man dales 17:30; les chertes al prisc de 7,00€ pó gni cumprades ti ofizi turistics da Corvara, Calfosch, La Ila, y le de dl spetacul tl stade dala dlacia. Mituns cina 10 agn vá debann.

Cripele viënta a La Ila
La cripele é un di sëgns plü conesciüs dl Nadé te nostes valades. Ciamó plü emozionant él da podëi ti ciaré a na rapresentaziun dla cripele viënta
En chësc ann vëgnel metü da jí la rapresentaziun dla cripele viënta a La Ila. Chësta iniziativa organisada dal'Assoziaziun Turistica de Badia gnará tignida pro la majun da Picenin a La Ila Alta. En jöbia ai 26 de dezëmber podarán odëi por le pröm iade la rapresentaziun dales 17:00 ales 18:00. Al gnará rapresenté la bela storia dl nadé dl Signur y al sará ince le Cor Kerygma che porta dant de vigni sort de melodies da Nadé. La rapresentaziun gnará ciamó metüda da jí n iade ai 2 de jená, tres dales 17:00 ales 18:00.

Iconografia di angeli

Le Consëi de Formaziun Badia inviëia a n referat interessant cun Danila Serafini, en lönesc ai 23 de dezëmber dales 20:00 tla Ciasa J. B. Runcher a Badia
Le tema di Angeli se tira fora por döta la storia dla porsona y tol ite n pinsier sot sön le raport danter l'umanité y ci che vá sura sües conescënzes fora, o coche Talmud dij, danter »chi jö dessot« y »chi sö dessura«. Tl referat dal titul »Iconografia di angeli« vëgnel splighé coche i angeli é gnüs rafigurá ti secui desvalis, coche chësta sort de rafiguraziun é gnüda condizionada dala storia y dala religiun.

Marcé da Nadé a Corvara

Le Marcé da Nadé sön plaza de Comun a Corvara deura dal vëndres ai 20 de dezëmber cina ai 5 de jená, dales 16:00 ales 19:00
Tles piceres ciasotes vëgnel venü de vigni sort de patüc da Nadé, sciöche articui de artejanat, decoraziuns da Nadé o ince spezialités y produc dl post. Al ne manciará sambëgn nia n bun té cialt o n gote de vin cöt. La cripele de grandëza naturala i fajará da cornisc al pice marcé. Tratan les festes da Nadé sarál plü grups che se crüzia dl intratignimënt musical, dagnora dales 17:00 inant; y i mituns podará te plü ocajiuns ince se fá n pice rait cun i pony. Tl salf dles manifestaziuns sarál spo da odëi la mostra dedicada ai angeli, cun operes de plü artisć ladins. Le de de Nadé röiel alerch »Babbo Natale«, che ti porta na picera scincunda ai mëndri y ai 5 de jená sarál la »befana« che storj pro ince pro le Marcé da Nadé; intrami i iadi dales 17:00.

La magia dl Nadé a Calfosch

Ince tratan les festes da Nadé vëgnel metü da jí sön plaza de paisc a Calfosch la manifestaziun »La magia dl Nadé«
Sön plaza dan la dlijia de San Vighile vëgnel dé fora de vigni sort de duciaries sciöche ince n bun té cialt o n gote de vin cöt. Pro l'apuntamënt di 27 de dezëmber sarál le duo »Whiskey & Ginger« cun Annika Borsetto y Tom Blaas che abelësc le domisdé. En ocajiun dl ultim apuntamënt, ai 3 de jená, sarale le duo »Marketta« che porta dant les plü beles melodies dl Nadé. La manifestaziun mët man intrami i iadi dales 16:30 y vá cina ales 18:30. Ara se trata de na bona ocajiun por passé adöm n domisdé te n'atmosfera tradizionala dl tëmp da Nadé.