Manifestazions atuales

Data

31 de jené 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 31 de jené
Dotors
Dutor Gherdëina
L dutor de servisc da n sada ai 01.02. dala 8:00 daduman nchin la 8:00 daduman de n lunesc ai 03.02. ie l dutor Valentin Tröbinger de Sëlva, tel. 0471/773073 o l 335 6844944.
Doturs Val Badia
Le dotur en sorvisc tl fin dl'edema di 1. y 2 de forá, ti comuns de Mareo y San Martin de Tor, é le dotur Luca Galiazzo, tel. 342 5181295; ti comuns de Badia, Corvara y La Val él en sorvisc le dotur Alberto Caretta, Badia str. Pedraces 57, tel. 0471 839706 o 380 3161999.

Apoteches

Apoteca Gherdëina
La apoteca che ie de servisc ora dl orar ordiner de giaurida, da n vënderdi ai 31.01. nchin n vënderdi ai 07.02. ie chëla de Sëuc, tel. 0471/708970 (orar de giaurida lu-ve 8.30-12.30/15.00-19.00, sada 8.30/12.30. Turnus: 9.00-12.00).
Apoteca Val Badia
L'apoteca en sorvisc fora dl orar ordinar, dal vëndres ai 31 de jená dales 19:00 al vëndres ai 7 de forá ales 19:00, é chëra d'Al Plan, tel. 0474 501240.

Avisc

Atualmënter
Museum Gherdëina daviert
L Museum Gherdëina a Urtijëi tla Cësa di Ladins ie daviert per la sajon da d'inviern da merdi nchin vënderdi for dala 10:00-12:30 y 14:00-18:00, nchin ai 9 de auril.
Atualmënter
»Club Boé«
Le grup de autoaiüt »Club Boé« por problems d'alcol o d'atres dependënzes s'incunta vigni mertesc dales 20:00, tla Ciasa di Stüdafüch a La Ila altaite. Les porsones de referimënt é Hubert (tel. 339 1698343) y James (tel. 338 5975817).
Atualmënter
Udiënzes dla Uniun di Ostis
La Uniun di Ostis HGV tëgn udiënzes ince tla Val Badia, vigni secundo y cuarto lönesc dl mëis, dales 16:00 ales 17:00 tla ciasa de Comun a Badia.
Atualmënter
L'Ofize de »Ëres dëida Ëres«
L'ofize a Bornech é da ciafé tla str. Paul von Sternbach nr. 6, info.bruneck@frauen helfenfrauen.it. Al é davert dal lönesc al vëndres dales 8:30 ales 11:30. Fora de chësc orar, vëgnel tut sö termins sön prenotaziun. Tel. 0474 410303.
Atualmënter
Iniziativa di ëi de Puster – MIP
L'ofize dla MIP–Männer­initiative Pustertal dëida i ëi y peri pro caje de devorz, pîta aiüt te situaziuns de dificolté. L'ofize é tl Paternsteig nr. 1 a Bornech y é davert lönesc y mercui dales 14:00 ales 19:00, vëndres dales 8:00 ales 12:00. Tel. 0474 555848, info@mip-pustertal.it
Atualmenter
Carnascèr a concors a Moena
L Comun de Moena con Perle Alpine endreza n concors per la festa che vegnarà endrezèda a Moena en mèrtesc de carnascèr ai 25 de firé. Vegnarà premià i miores de ogneuna de la 3 sezions: cères, mèscres di gregn e mèscres di bec fin ai 14 egn. L'é da se scriver ite te secretariat del Comun de Moena al 0462 573141 o secreteria@comune.moena.tn.it
Atualmenter
Mascherèdes ta Penìa
L Grop de la Mèscres de Dèlba e Penìa porta dant doi mascherèdes da les 20:30 te la veia scoles de Penìa. En sabeda ai 8 e en mèrtesc gras ai 25 de firé vegn portà dant »Bricons e galantomes« de Fabio de la Menina e en jebia grassa ai 20 de firé vegn spilenà »Piere dal Polver e l pat col malan« de Simon de Giulio.
Atualmenter
Carnascèr sui brenc a Vich
L Comun de Sèn Jan con Vich Events à metù a jir per carnascèr l percors de le ciasete sui brenc. Te la vedrines olache tel temp da Nadèl vegn metù fora la cripeles, per dut l meis de firé se pel veder de bie alestimenc da carnascèr metui fora da volontadives e sociazions. Te ofizi di ghesć l'é a la leta la mapa.
01.02
Festa de Sèn Jan Bosco
Doman sabeda prum de firé te parochia de Poza vegn metù a jir la festa de Sèn Jan Bosco per duc i fidei. Da les 18:00 l'é la messa animèda dai gropes de la catechesi, da les 19:00 te oratorie la cena su prenotazion a oferta ledia e da les 20:30 te teater de l'oratorie l spetacol su don Bosco per endrez del grop de joegn.
02.02
Cianton da marevea... d'istà
La sociazion Inout met a jir d'aisciuda n cors de perfe­zionament per joegn ciantarins e strumentisć, con 10 lezions individuèles e 5 de grop, al cost de 100 euro. Posć limité, prejentazion en domenia ai 2 de firé da les 20:30 te Oratorie de Poza. Info: 349 7245842 (Samantha) o 349 6491192 (Thomas).

Chino

Atualmenter
Chino de Cianacei
Insnet, vender ai 31 de jené, en sabeda al prum e en dmenia ai 2 de firé da les 21:15 se pel veder »Manaslu - La montagna delle anime«, documentarie con Hans Kammerlander e Reinhold Messner. En dome­nia ai 2 de firé da les 17:00 l'é enveze en program »Sulle ali del'avventura«. En mercol ai 5 da les 21:15 vegnarà moscià amò »Manaslu - La montagna delle anime« e en vender ai 7 semper da les 21:15 »Odio l'estate«.
Atualmenter
Chino de Tieser
Insnet, vender ai 31 de jené da les 20:00 l'é la cena e l spetacol con »Chef a Teatro«. En sabeda prum de firé da les 17:30 e da les 21:15 vegn moscià »Dolittle«, en program ence en domenia ai 2 da les 17:00; semper domenia da les 20:30 vegn dat enveze »Richard Jewell«. En mèrtesc ai 4 da les 20:30 (lengaz originèl con sotetìtoi) e en mercol ai 5 da les 21:15 se podarà veder »1917« e en jebia ai 6 da les 21:15 »Un giorno di piogia a New York«. En vender ai 7 de firé la filodramatica de Fornace portarà dant la comedia »Bertoldo«.

Cursc

02.03.–06.04.
Curs per se njenië ca a parturì
Per ëiles che aspieta y genitores dl daunì, che à l terminn de auril /mei 2020. L'ancuntedes sarà tla palestra dla cësa de paussa a Urtijëi dai 02.03. ai 06.04. uni lunesc dala 16:00 ala 18:00/19:00. Iscrizions: CUPP tel. 0471 457457, 8:00-16:00 da lu- a ve.; email vormerkung.bz@sabes.it; ëifoma 0471 797778, assistënta sanitera 0471 794290.

Iadi y Jites

05.02.
Jita cun i schi a Speikboden y Klausberg
La grupa »Nëus jon pa bel plan« dla Lia da Mont de Gherdëina mët a jì n di cun i schi sun i purtoies de Speikboden y Klausberg. n possa se scrì ite nchin duman sada ai 01.02. da Ciofs Ingea Urtijëi , da Malsiner K. Panaval a S. Cristina y te Sëlva da Sport Bruno Riffeser, ulache n giapa nce l program plu avisa.
09.02.
Jita de schi alpinism te Vals (A)
La Lia da Mont de Gherdëina nviei a fé pea chësta jita. L sarà da fé n deslivel de n 940 m y da jì n 4 ëura suvier. Per plu nfurmazions pudëis cherdé su Arnold al 333 4377171. Da sé nuté su iel mo ncuei vënderdi, 31.01. tla butëighes Ciofs Inge, Sport Malsiner y Sport Bruno Riffeser.
26.–30.04.
Te Irland cun l KVW de Sëlva
Viac per cumëmbri y simpatisanc te Irland, ulache n vijiterà Dublin y la bela campanies ntëurvia cun i pitli luesc, ruvan nchin pra i 'Cliffs of Moher« sun l Atlantich. L sarà mesun cunëscer cundizions de vita defin particuleres. L sarà nce for pea n/a mëinajita. Bele śën pòssen se lascé nuté su da Rudolf (335 6380973 o da sëira 0471 794375), che saverà nce da dé vel' nfurmazion.
23.–24.05.
Ala »Festa dla narzisses« cun l KVW de Sëlva
N chëla sada y dumënia fajeràn n viac cun la curiera a chësta festa cunesciuda a Bad Aussee y al Traunsee tl Salzkammergut. Sibe cu­mëmbri che simpatisanc possa bele śën se lascé nuté su. L program plu avisa unirà publicà a mez fauré. Nfur­mazion giàpen da Rudolf (335 6380973 o da sëira 0471 794375).

Leteratura

05.02.
»Cuartet leterer« per tudësch y dal vif
N mierculdi dala 18:00 n ucajion dla »Bücherwelten« tl Waltherhaus a Bulsan. L Cuartet leterer, cun Ruth Bernardi, Ingrid Runggaldier, Roland Verra y Mateo Taibon – cunesciù dala trasmiscion radio dal medem inuem – prejenterà per tudësch tesć ora dla leteratura ladina de autores coche Max Tosi, Frida Piazza, Felix Dapoz y Teresa Palfrader.

Religion

01.02.
Mëssa di pitli
Duc i genitores cun mutans, mutons y popsc y sambën laves y nëinesc ie nviei de cuer ala S. Mëssa di pitli duman sada, dala 17.00 tla gran sala de calonia a Urtijëi. Sun vosc unì se ncunforta l pluan Sn. Vijo Pitscheider y i genitores che mët a jì.

TELEVIJION

04.02
Tassìe: vindò i ogec che tegn ite sìmboi
Da les 20:50 ca. I ogec de la tradizion ladina i é piens de sìmboi che revela cherdenzes e segnificac. Chisc ogec i desmostra l leam fon de la jent ladina con la fe e la religion e i palesa i tassìe de usanzes che rua dal fon de noscia storia e che, a na vida neva, se porta inant amò ades. Program de Cinzia Pistoia, a cura de Anna Mazzel
05.02
Maximilian I de Habsburg
Da les 20:50 ca. Ester stà bon ntel 1511 de ciapà l ciastel de Botestagno, luoch importante per controlà i comerzi che jiva dai pais todesch del vars de Venezia, l eva stà n valch no da puoch per l'imperador Massimilian I. N obietif studiè ntei agn davant, per chel che l ava bù da conzede piena autonomia a la val de Anpezo, e che l ava portà l'imperador medemo a fà su, come ringraziament per avè ciapà l ciastel, la Via Crucis de Toblach, vero capolavoro de l'art e la storia de dut l Tirol. Na storia chesta che demà da puoz agn le doi comunità de Anpezo e Toblach i é vegnude a savè e che ades la le lia ncora de pi de chel che le fosse davantvia. Program de Giulia Tasser y Hanspeter Karbon, a cura de Alessandro Dapunt
06.02
Scenar ert y cultura
Da les 20:50 ca. Program de Ivan Senoner, regia de Hanspeter Karbon, a cura de Leo Senoner

RADIO

LADINIA LIVE: microfons davierc sun atualità y cultura. Da aldí vigni mertesc y mercui da les 13:45 ales 14:00
04.02
Rezetes feminines
Da les 13:45 – 14:00. Maria Rizzi nes condüj zoruch tl tëmp por ciutié ite te so rezetar dl ann 1889. Deboriada cun Olimpia Rasom orunse jí sön les pedies de saus da zacan. Moderaziun: Sara Frenner. La trasmiscion »DAI CRËPS DL SELA« ie da audì uni di dala 19:05 ala 19:30 sun la frecuënzes de RAI LADINIA
31.1
L cor Flatcaps
Da les 19:05. L cianté à te nosc raion na gran tradizion y l ie truep ciantarins che l fej cun na gran pascion y ueia. Te studio ons nvià Aaron Demez de Sëlva che ie dal 2014 incà dirighënt dl cor mescedà »Flatcaps« y nce la ciantarina Katrin Kostner. I »Flatcaps« tenirà prosci­mamënter na tournée de cunzerc te nosta provinza dal titul »Luis sucht Chor«. Tras­miscion de Georg Mussner.
01.02
Momënc de vita: intervista a Pio Colcuc
Da les 19:05. Pio Colcuc é nasciü tl 1928 a Col de Santa Lizia. Al á imparé le laur da carigá da so pere y cun 92 agn vál ciamó vigni de a laoré te süa botëga. Pio nes cunta dla scora elementara tratan le fascism, de sciöche al á imparé le laur y dla lataria da Col. N program de Erika Castlunger.
03.02
Cuartet leterer: Alberta Rossi
Da les 19:05. L cuartet leterer de RAI Ladinia metù adum da Rut Bernardi, Ingrid Runggaldier, Roland Verra y Mateo Taibon tòl sot al udlon chëst iede la scritëura fasciana Alberta Rossi y si lëur »Misteres, aventures e magica creatures«. Program a cura de Leo Senoner.
05.02
La soricia (6): La Re-ladinisazion e i joegns
Da les 19:05, la soricia vegn a ne troèr per l'ùltima outa. Tita Mënatizes auza fora chel che podessa esser l davegnir di ladins e en particolèr i joegn. Cognoscer so lengaz, si strumenc, i social media é strategich per dèr tres l messaje de re-ladinisazion! Program de Anna Mazzel.
06.02
N'idea jeniala
Da les 19:05. Le studio de grafica Misign á albü l'idea jeniala da taié la corda. Avisa olá che al é rové, chël gnëise al savëi ascutan chësc pro­gram. Program de Sara Frenner.
Informaziuns plü menüdes söi programs radio y televijion de RAI Ladinia pón ciafè sön www.raibz.rai.it – Sun l medem sit i programes TV sarà da vedei sota »Mediateca« y les trasmiscions radio sota »Podcast«.

Sozial

Atualmenter
Portel de referiment sozièl
Te Comun general, te strèda di Pré de Gejia a Sèn Jan vegn metù a jir n portel de refe­riment sozièl per problemes de dependenzes o de autra sort, avert a duc e no a paa­ment. Ge vel se prenotèr a la Coprativa sozièla Le Rais chiaman l 370 3004296 o scriver a: sportello.lerais@gmail.com
Atualmënter
Soma liedia da chëutes per chiche ie n pension
A chëi che ie n pension y à mo n davani da dependënc ti vëniel cunsià de renunzië a tré ju da si pension la soma liedia da chëutes (Steuer­freibetrag). Pra la detlarazion dla chëutes pòssen nsci smendré o nchinamei schivé de messëi paië chëutes. Chësta renunzia muessa unì fata a l savëi uni ann y l ie mesun l fé tres l KVW/ACLI, http://www.mypatronat.eu
07.02.
Deberieda: La plu bela fotografies di viages de Sandra
N vënderdi che vën se ùrten dala 14:00 tla sala dla sentedes dl Servisc Soziel a Urtijëi, str. Purger 16, a ti cialé a foto­grafies dl'India, Iran y Mada­gaskar. 'Deberieda' ie na grupa per se ancunté danter persones che à problems psichics o de sozialisazion cun ulenteres. Infos: 0471 798015.
Nchin ai 29.02.
Detlarazion RED 2019
Trueps de chëi che ie n pension muessa dé ju la detlarazion RED, ma i ne vën nia nfurmei diretamënter dal'INPS. I possa perchël lascé cialé do dal KVW sce i muessa dé ju chësta detla­razion o no. La detlarazion RED 2019 muessa unì data ju nchin ai 29.02. Per fé ora n terminn pra l KVW cherdé su l 0471 941704 o jì sot a www.mycaf.eu

Mostres y Ert

Atualmenter
Mostra di dozenc del Liceo Artistich
Te sala esposizions del Liceo Artistich a Sèn Jan se pel veder la mostra coletiva di dozenc de la Scola Ladina »Vis[j]ions«. L'esposizion é averta fin ai 13 de firé da les 9:00 a les 12:00 e da les 14:00 a les 17:00 fora che de sabeda e domenia.
Atualmënter
Aurora Borealis
Mostra de fotografies fates da Simon Moroder, graficher y apasciunà de astronomia, che ie jit ti paejes dl nord a udëi y pultré ju l fenomenn dla lums polares. La mostra ie da udëi a Urtijëi tl Café Surëdl, streda Roma 101, de lunesc dala 13:00 ala 19:30 y da merdi nchin sada dala 10:00 nchin la 19:30.
13.02.
»Furmazions cromatiches« de Carlo Mussner
Per »Kunst im Gange« tla cësa de chemun a Laion vëniel giaurì n juebia ai 13.02. dala 18:30 na mostra de pitures dl artista de Urtijëi. Si pitures de paesajes ie nce n juech de culëures, che se muev danter l realitich y la nmaginazion. La mostra sarà da udëi ntan l'ëures de giaurida dl Chemun.
Atualmënter
Lëures di sculeies dl Lizeum d'Ert n con' di mejes
Tla mostra »Mejes« tla Cësa de Cultura a Urtijëi, vëniel prejentà i lëures di sculeies dl Lizeum d'Ert Cademia dla 5a tlasses de design, grafica y pitura. L se trata de n proiet nterdiszipliner sun i mejes. I lëures ie da udëi nchin ai 21.02. La ntreda ie debant.
Atualmënter
Mejes de Gherdëina, la memoria de na cuntreda
La mostra tla Cësa de Cultura a Urtijëi resterà davierta plu giut y plu avisa nchin ai 23 de fauré 2020, for da merdi nchin vënderdi dala 15:00-18:00, de vënderdi nce danmesdì dala 10:00-12:30 y de sada mé danmesdì dala 10:00-12:30.
Atualmënter
Al Plan: mostra »motus – crëps che armöi«
Tla Ciasa dl Parch a Al Plan él da odëi cina ai 28 de merz la mostra de fotografies »motus – crëps che armöi«, cun retrac di parcs naturai de Südtirol, te chi che l'artist Heinz Innerhofer anüza les figöres stilistiches dl movimënt y dl turgher. La ciasa dl parch é daverta dal mertesc ala sabeda dales 9:30 ales 12:30 y dales 14:30 ales 18:00. Entrada debann.

Temp Lede

05.02.
Usservé la stëiles y galassies
N mierculdi dala 21:00 dal hotel Interski a S. Cristina puderàn ti cialé al ciel de nuet tres telescops y l sarà nce n espert de astronomia che spiegherà cun na diashow cie che l ie tan da udëi. Per fé pea iel da se scrì ite nchin al di dant tla Lia dl Turism de S. Cristina, tel. 0471 777800.
05.02.
La Ila: jí cui schi da sëra
Sön la pista »Doninz« tl zënter da La Ila pón jí cui schi ince da sëra, en mercui ai 5 de forá dales 20:00-22:00. Por podëi anuzé le lift, mësson avëi na cherta dai schi de plü dis.
05.02.
San Ciascian: descurí le monn dl biatlon
En mercui ai 6 de forá án la poscibilité da imparé les carateristiches dl sport deboriada cun n maester de biatlon. A San Ciascian pón porvé da stlopeté, dales 9:30 inant. Iscriziuns ti ofizi turistics dl'Alta.
06.02.
Cun la liösa da ciaval do le Tru di Artisć
En jöbia ai 6 de forá pón se fá na roda do le Tru di Artisć, cun la liösa trata dai ciavai. An s'incunta dales 20:45 tla plaza da parché dan l'ofize turistich da La Ila, por pié spo da Altin demez do l'ega ite cina San Ciascian y indó zoruch. Le tru gnará ilominé da chentli. Prenotaziuns ti ofizi turistics dl'Alta Badia.
06.02.
»Bun de Gran Risa«
Da en jöbia ai 6 de forá cina ai 12 de merz pón jí cui schi söla Gran Risa bele dales 7:00 da doman inant. Te chësta ocajiun podarán se fá dui raic acompagná da de plü maestri de schi y da n fotograf. Le pröm iade por ciaré jö la pista y le secundo iade podarán fá n slalom cört pian ia dal start dla Copa dl Monn. Pre­nota­ziuns ti ofizi turistics dl'Alta Badia.
07.02.
Uniun Maestri Ladins: Cun les ciaspes a tëmp de löna
L'UML inviëia direturs, insegnanc atifs y en pensiun dala scolina ales scores altes y le personal dla scora a na spazierada cun les ciaspes a tëmp de löna, en vëndres ai 7 de forá. An s'incunta dales 17:30 sön plaza dla scora de Badia por jí deboriada sön Valgiarëi y da iló inant cun les ciaspes cina al Ranch da Andrè a cëna. Prenotaziuns anter i 04.02. pro Ingeborg Dejaco al 339 1696311.
11.02.
Cun l GAG al »Tanz der Vampire«
Ne ulon nia se lascé mucé l 'Tanz der Vampire' te Vals. Pion via dala 17:30 da Plaza S. Antone a Urtijëi. A Vals jirons su per purtoi cun la peves y lassù maierons da cëina per pona tlamé basite tl Aprés Ski. Pudëis ve nuté su da duc dl cunsëi o cherdan su Daniel (333 9454642). L ie na jita per duc y se ncunferton sun na bela sëira y na drëta hez.
20.02.
Defileda da Carnescià a Urtijëi – la plu bela mascres vën premiedes
N Juebia Grassa dala 15:00. Granc y pitli ie nviei a fé pea se lascian tumé ite vel' blòta mascra. La plu beles unirà premiedes sun Plaza de Dlieja, ulache l sarà nce mpue de festa cun mujiga DJ y de bon crafons. De majera grupes o carëc ie priei bel de se nunzië danora tla Lia dl Turism (tel. 0471 777600 o tres ortisei@valgardena.it).

Sport

01.02.
Val Gardena Xtreme Up
Duman sada dala 18:30 sun l purtoi da Frëina te Sëlva pierà via i atlec cun la peves, cun i grifs o la ciaspes, per ruvé do 2.370 m y n deslivel de 700 m sun piza de Ciampinëi. Per la 18:50 aspieten bele i prims te travert. La furnadoia de Ciampinëi fej n priesc speziel n chësta sëira. La premiazion sarà dala 21.15 tla Pitla Sala dla Cësa de Cultura de Sëlva.
01.02.
Partides dl HC Gherdëina
N sada dala 19:00 saràl tl stadio Pranives de Sëlva la partida dl campiunat AHL danter l HC Gherdëina y i Red Bull Junior de Salzburg.
Fauré
Pudejé sun Pana – l material giàpen debant
L Schi Club Gherdëina fej a l savëi che tl Zënter de pudejé sun Mont de Pana puderàn se mpresté ora l material debant ntan l mëns de fauré. L sarà mé da paië la ntreda per i purtoies. Chësta azion vel per duta la populazion de Gherdëina. Nvion duc a unì a fé na raida.

Galaria retrac