Manifestazions atuales speziales

Data

31 de jené 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 31 de jené
Workshop da cujiné sann
Cujiné spëisa sana por i mituns. Te na sëra de workshop a La Ila pón ciafé informaziuns y förtli de valüta. Ai 19 de forá
Ci é pa na alimentaziun sana y ci pói pa iö ti cujiné a mi mituns? Ai 19 de forá dales 17:30 vëgnel tigní, en colaboraziun cun le Consëi de Formaziun Badia, tl Zënter SaJ.un a La Ila na sëra de workshop y informaziun sön le cujiné sann por geniturs, cun la dra. Ivonne Daurú Malsiner.
Le cost é de 15,00€ a partezipant y les prenotaziuns vëgn tutes sö te Sorvisc ai Jogn Val Badia anter i 17 de forá al 0474 523070.

Garejeda raionela VSS de slalom strënt
N dumënia ai 2 de fauré sun Piz Sela
L Schi Club Gherdëina mët a jì n dumënia sun Piz Sela, da suinsom ju na garejeda de slalom strënt per mëndri dla categuries »cuccioli« nasciui tl 2008-2009 y »baby« nasciui ti ani 2010 y 2011.
L vën pia via dala 10:00 danmesdì per la prima manche y prësc do cun la segonda mé per i »cuccioli«.
La premiazion sarà ntëur la 13:30 dan la ustaria Tommaso sun Plan de Gralba.
L Schi Club Raiffeisen Gherdëina nvieia duc i apasciunei de schi a unì a ti cialé a chisc pitli campions.

»Welcome Home« – mostra de Adolf Vallazza
La giaurida ie ai 7 de fauré dala 20:00 te Tublà da Nives
Adolf Vallazza (Urtijëi, 1924) ie na figura iconica tl panorama dla scultura sibe naziunela che nternaziunela d'al didancuei. Sustenidëur da ardimënt y rigurëus dl ziplé, àl dedicà si vita a na tecnica che nchin su per i ani '50 univa rateda bona mé per i lëures artejanei, y la à auzeda a denità artistica, ti giaurian nsci la streda a doi generazions de artisć de Gherdëina.
Da na idea de Tobia Moroder y Ivan Senoner, n cunlauraziun cun l »Archivio Vallazza« y cun l sustëni dl Chemun de Urtijëi, ti gëura l Tublà da Nives la portes al gran artist Adolf Vallazza, 50 ani do si ultima mostra te Gherdëina.
L titul ne po' nia vester n auter che »Welcome Home«.
La mostra sarà da udëi dai 08.02. ai 15.03. for dala 16:00-19:00. De lunesc ie l Tublà da Nives stlut.

Dal alcol pón se delibré
Che me dëida pa? Sce l'alcol o d'atres dependënzes é o pó deventé n problem, por te o por les porsones che te stá dlungia, él i grups de autoaiüt che pó te daidé. Insciö él ince i Clubs che dá n aiüt concret
Canche l'alcol devënta na dependënza, pól desdrüje porsones y families intieres. I grups de autoaiüt pó ester n sostëgn concret por nen gní fora, deache: Dal alcol pón se delibré. Sce l'alcol é n problem por te, o por porsones che te stá dlungia, poste damané do aiüt pro:
Club Boè, tla ciasa di stödafüch a La Ila, da sëgn inant vigni mertesc dales 20:00 ales 21:30. Porsones de referimënt é Hubert al 339 1698343 y James al 338 5975817.
Club Pütia, tl raiun sozial a Picolin, vigni mertesc dales 20:00 ales 21:30. Porsona de referimënt é Paul al 348 6108479.
Aziënda Sanitara da Bornech – Sorvisc por les dependënzes, dra. Marion von Sölder, tel. 0474 586200.
Infidete y ais coraje: fá le pröm vare. Dales dependënzes pón nen gní fora, sce t'os. Te pos mëte man danü.

»Revolution« te Gherdëina cun l Janoska Ensemble
N mierculdi ai 05.02. dala 20.30 tla Cësa di Cungresc a Urtijëi
»Revolution from Vienna to Liverpool« ie l titul dl cunzert cun tlavier y archëc dl »Janoska Ensemble« a Urtijëi. La grupa ie metuda adum dai trëi fredesc Ondrej Janoska vidula, Roman Janoska vidula, František Janoska tlavier y da Julius Darvas violon. Sibe tl album de referimënt che tl cunzert »Revolution« iel laite elemënc tlassics, moderns y nce cumposizions »autoctones« Janoska, che fej ora l »Janoska-Style«, ulache l ti vën, pra la mujiga tlassica, nce lascià lerch ala mpruvisazion.
Program: Mozart, Ouvertüre ora dla noza de Figaro, Tchaikovsky Melody in E flat major op. 42/3, Janoska Hello, Prince!, Lennon/Mc Cartney Yesterday, Wieniawski Thème Original Varié Op. 15, Kreisler Präludium y Allegro, Bach Air, Janoska Leo's Dance, Lennon/McCartney Let it Be, Janoska Cole over Beethoven.

»Ert ie zeche de bel«
Cuncors de dessëni di sculeies dla scoles mesanes de Gherdëina
Cun chësc titul vëniel, ncuei vënderdi ai 31 de jené, giaurì te Tublà da Nives te Sëlva la mostra de dessënies di sculeies dla scoles mesanes de Gherdëina.
Per dut l fin dl'ena (31.01. – 02.02.) pòssen udëi i lëures di sculeies che à fat pea pra l cuncors »Ert ie zeche de bel«, metù a jì dala Lia Artejanat Artistich Gherdëina, l'APA/LVP y la Camera dl Cumerz de Bulsan, n ucajion dl iubileum di 50 ani dla »bola«, la merca de scunanza per l artejanat artistich te Südtirol.
I orares de vijita: 31.01. nchin ai 02.02.2020, uni di dala 10:00-12:00 y 16:00-19:00.
La giaurida ie ncuei vënderdi ai 31.01. dala 10:30 te Tublà da Nives.

Get Ready!
Co sona pa n cuntrabas o na ukulele? Co vëgn pa soná i stromënc y ci storia él pa doía?
A chëstes domandes ti dunse na resposta al curs de musiga »Get Ready«. Elemënc fora dla formaziun ritmich-musicala y jüc: döt chësc ti dá na basa musicala ai mituns y ales mitans ti pröms agn de scora y dess ince ester ince n invit a ciafé fora ciun che é le stromënt che plej y passenëia deplü.
Le curs é ponsé por mituns y mitans dla 1a – 2a elementara y vëgn tigní le mertesc domisdé por 8 iadi dai 25 de forá ai 14 d'aurí a Al Plan. Le curs vëgn organisé da Badiamusica y tigní da la musizista Esther Videsott.
Por informaziuns y iscriziuns scrí n SMS al numer 333/9161652 o mené na mail ala misciun: esther_vide@hotmail.com

La sacralità dl pan
L Museum Gherdëina nvieia a na cunferënza n juebia ai 06.02. dala 17:00 tla mostra »Mejes« te Cësa de Cultura a Urtijëi
L etnologh y tuadëur scientifich Siegfried de Rachewiltz tën na cunferëza tla mostra »Mejes de Gherdëina, La memoria de na cuntreda« de plu aspec dla sacralità dl pan tl'antichità, tla religions di populi, dl 'panis angelorum', dl pan via per l ann y ntan l zitlus de vita dla jënt tl raion dl Tirol, dl pan da uni di y dl pan per la festes, formes de pans simbolics, fuiaces, pans speziei (pans a imaja) y dl pan de carater magich per se varenté dai striunëc. L referat ie per tudësch.
La ntreda ie liedia y n ne n'à nia drë de se lascé nuté su!
La mostra »Mejes de Gherdëina« ie unida slungëda nchin ai 23 de fauré 2020.
www.museumgherdeina.it

Gara de paslunch sot les stëres
En vëndres ai 7 de forá a Al Plan de Mareo
La Cooperativa Turistica Al Plan/San Martin mët da jí na gara de paslunch sot les stëres, en vëndres ai 7 de forá. La gara mët man dales 19:00 tl raiun Pëscpësc a Al Plan (olache la pista pëia ia) y röia cina ta Ciamaor. Les iscriziuns vëgn tutes sö al 0474 501037 o ala mail info@sanvigilio.com

Show sön i schi a Corvara
La Scora de Schi da Corvara – Ladinia en colaboraziun cun l'Assoziaziun Turistica mët da jí en lönesc ai 3 de forá na skishow sön la pista »Abrusé« dlungia le lift Boé a Corvara
I maestri dla scora de schi fajará na desmostraziun dles tecniches dl jí cun i schi, dal schi alpin al telemark y ince le jí cun la brëia do le ritm dla musiga. Implü sarál ince le freestyle team »Pirates« che mostrará de vigni sort de acrobazies tl'aria. Le publich podará en chësta ocajiun ince amiré i salc y le spetacul rich d'adrenalina dl campiun de liösa a motor Alex Ploner da San Ciascian. La manifestaziun mët man dales 21:00 y sambëgn ne manciarál nia tröp devertimënt y musiga dal DJ.

Terracotta de Manfred Mureda
Giaurida dla mostra n sada ai 8.2. dala 18:00 tla Lia Mostra d'Ert/Circolo a Urtijëi. Prejentazion de Egon Rusina
Manfred Mureda fej la Scola d'Ert a Urtijëi y va dopro a studië ert a Firënza. Ti ani '70 nsëniel dessëni a Persenon y lëura nce coche artist, se dajan ju dantaldut cun azions artistiches de prutesta soziel-pulitica, film, videos y nstalazions. Dal 1980 al '89 iel curadëur dl »Künstlerkreis S. Erhard« a Persenon.
Da canche l se à trat zeruch dala vita publica, àl inò scumencià à se dé ju dassënn cun l mudelé, lauran dantaldut cun la terracotta. Ti ultimi ani se à Manfred dat ju te na maniera plu sota cun la cumbinazion y la fujion dla scultura preistorica y chëla cuntemporana. La criazions de Mureda ie for na pert, n tòch de na storia. Ël ti lascia lerch ala nterpretazion de uni persona che ti cëla a si lëures; opres che ne porta mei a na contlujion definitiva ma va for inant te na lerch zënza fin. Manfred y si terracotta ie dut un, na simbiosa, sterscia y dlicata tla medema lerch.
La mostra sarà da udëi nchin ai 18 de fauré, uni di dala 10:00 – 12:00 y 17:00 – 19:00; de lunesc iela stluta.