Manifestazions atuales speziales

Data

21 de fauré 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 21 de fauré
Al Plan: defilada da Carlascé
Döta la jënt – cun o zënza maschera – é bel inviada da gní ala defilada por la festa plü matorina dl ann. An s'incunta en mertesc ai 25 de forá a Al Plan de Mareo
En mertesc ai 25 de forá vëgnel indó fat le Carlascé a Al Plan de Mareo. Döta la jënt, cun o zënza maschera, é inviada da gní a fá para pro la gran defilada, tres la strada prinzipala. Chi dales mascheres s'abina dales 2 domisdé tla plaza dan la ex nodadoia curida, olache an ciafa la zetola de partezipaziun. La defilada pëia ia dales 14:30, por rové cina sön plaza dl paiun, olache al sará la premiaziun dles plü beles mascheres, cun cornisc musicala, val' de cialt da bëre y ciacoles da carlascé.

Gran Bal da Carnescé
La Müjiga de Badia adöm cun i Jogn de Badia ves inviëia cun ligrëza al gran Bal da Carnescé ai 22 de forá, tla Ciasa Jan Batista Runcher a Badia
Indoman sabeda ai 22 de forá él tla Ciasa J.B. Runcher a Badia le Bal da Carnescé. Portes davertes dales 21:00 inant, cun entrada sura i 16 agn. Por l'intratignimënt musical unse nosc DJ dl post Dj ELF y diretamënter dal'Austria vëgnel »Die 3 Verschärft'n«, che nes portará fora por la serada a ritm de polca y valzer.
Al ne gnará nia ma premié la maschera plü bela, mo ince le grup plü creatif. Porchël lascede jí osta fantasia y gnide düc cun vëia da fá festa y da sté adöm en compagnia.

Multisport isté 2020
Dal'acrobatica al tennis, dala roda al nodé, dales erts marziales al bal modern, dal jadiné al hockey cina al palé y beachvolley. Chëstes é les ativités dles edemes de Multisport tl'Alta Badia
Ince chësc isté vëgnel pité tl'Alta Badia plü edemes de Multisport, por mituns dala 1. elementara cina ala 1. mesana. Multisport é na moda inovativa por imparé da perfezioné tröpes ativités motories. Ai partezipanc ti spetel acrobatica, tennis, nodé, roda, modern dance, erts marziales, jadiné, hockey, palé, beach volley.
Che pa?
Al gnará fat trëi grups:
Kids1 (1a y 2a elementara, 2013-2012);
Kids2 (3a y 4a elementara, 2011–2010);
Junior (5a elementara y 1a mesana).
Can pa?
1. pert (3 edemes): dai 29.06. ai 03.07.; dai 06.07. ai 10.07.; dai 20.07. ai 24.07.
2. pert (3 edemes): dai 27.07. ai 31.07.; dai 10.08. ai 14.08.: dai 17.08. ai 21.08.
Dagnora dal lönesc al vëndres dales 9:00 ales 12:00 (grup dla doman) y dales 13:00 ales 16:00 (grup dl domisdé). Tó pert pó min. 10 porsones, max. 16 porsones por grup.
Cun che?
Referënc di grups sará Thomas Valentini, Davide Moling, Emanuel Gravino y Andreas Forer, deboriada cun i tröc alenadus dles sozietés sportives. An s'incunta dagnora a La Ila. Le cost é de 40,00€ al'edema por vigni partezipant.
Informaziuns
Les iscriziuns é dai 2 ai 15 de merz sön la plata online
https://forms.gle/iFkz5AwPk1NTkGbYA
An podará se scrí ite ala 1. o ala 2. pert o a intrames. Al ti gnará dé la prezedënza ai jonins che se scriará ite a intrames les perts. Le curs é a numer stlüt.
Informaziuns ciafon pro Thomas Valentini al numer 339 1433016, pro Martina Sverzellati al 339 2975690 o ala e-mail info@sciclubladinia.it
Le proiet vëgn organisé en colaboraziun cun Ski Team Alta Badia, US Alta Badia, ATC Tennis Ladinia, Badiasport ASD, Alta Badia Nordic, US San Ciascian, US La Ila, Hockey Club Alta Badia y Ice club Alta Badia.

Finissage dla mostra »MEJES« cun cunvëni daviert al publich
Ncuei vënderdi, 21.02. dala 14:30 ala 18:00 tla Cësa de Cultura a Urtijëi, tla sala dla mostra »Mejes«
L Museum Gherdëina nvieia al cunvëni de stude cun ghesć de gran caratura n ucajion dla finissage dla mostra »Mejes de Gherdëina – La memoria de na cuntreda«, cun referac y descuscion. Tl zënter dla manifestazion iel mo n iede la mpurtanza dl mantenimënt y l daunì di mejes y si valor culturel.
La ntreda ie liedia.
Program avisa sun www.museumgherdeina.it.
Nfurmazions: Museum Gherdëina, Cësa di Ladins, tel. 0471 797554.
Ultimi dis per ti jì a ti cialé ala mostra »Mejes«!
La ie mo davierta nchin n dumënia ai 23 de fauré y plu avisa ncuei vënderdi dala 15:00-18:00, y duman sada y n dumënia mé danmesdì dala 10:00-12:30.

Nia mé maroca
Na mostra cun performance, mujiga, formes y paroles che uel mustré su n auter aspet dla maroca
Tla sala dla Lia Mostra d'Ert/Circolo a Urtijëi, cun Paul Moroder, Andreas Kondrak y Marion Moroder. La giaurida cun performance ie n juebia ai 27.02.2020 dala 20:00 cun ntroduzion de Igor Comploi.
La produzion de massa – cunseguënza de iniuranza umana. Na preduminazion che concuistea duta la cumenanza, nce sce la ne se rënd nia cont. La perspetiva scura spidlea l sfrutamënt dla criazion, ajache uni singula persona à na finalità sparcantona y na cumprenscion narzijistica dl pudëi. L mur ilusionistich muessa unì batù ju per se destanzië dala tirania, per arjonjer n pont d'ududa nuef. La reurganisazion dl mond cun n sentimënt de vita uman y recunescënt.
La mostra resterà davierta nchin ai 15 de merz, uni di dala 10:00-12:00 y 17:00-19:00, de lunesc iela stluta.

Show cui schi te paisc
En jöbia ai 27 de forá vëgnel metü da jí tl zënter da San Ciascian n spetacul söi schi, cun na pista arjignada ca aposta por la manifestaziun
I maestri dla scora de schi da San Ciascian mostrará le svilup y la storia dl schi, sciöche döt á metü man, cina ales tecniches plü modernes d'aldedaincö. Ince l'intratignimënt musical cun Dj Elvis sará caraterisé da cianties liades ala storia dl schi. Le show mët man dales 21:00 y i spetadus pó s'la conforté da odëi i maestri de schi che vëgn dal hotel Diamant jö cina te plaza dan dlijia. Al ne manciará nia tröp devertimënt y val' da bëre.