Manifestazions atuales speziales

Data

31 de messel 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 31 de messel
Degustaziun de bira artejanala
Le Ciastel Colz a La Ila ti fej da cornisc ai dui apuntamënc cun la degustaziun de bira artejanala de Südtirol, söl program tratan le mëis d'agost
En lönesc ai 3 d'agost gnarál tigní la pröma degustaziun adöm cun la biraria »Köstlan Brauwerkstatt Brixen«. Dales 17:00 sarál le produzënt instës che presentëia les carateristiches de süa bira tla curt dl ciastel. I partezipanc á la poscibilité da ciarcé de plü sorts de bira.
Le secundo apuntamënt é preodü la jöbia ai 20 de agost cun la biraria »Monpiër« de Gherdëna. Por tó pert ales degustaziuns mësson se scrí ite ti ofizi turistics dl'Alta Badia. L'iniziativa vëgn metüda da jí tl respet dles regoles preodüdes.

»Overture in Nature«
Pröms dui conzerc dl festival »Transit« de Badiamusica, te n format nü y adaté ala situaziun
Dal mëteman dl festival n format de conzert nü, cun la natöra sciöche gran salamënt da conzert. Cun l'inciaria »Musiga a destanza« tol sö musizisć jogn dla Scora de Musiga Val Badia la desfida da invié les porsones a d'ascuté sö so soné da na pert al'atra dla valada, zënza amplificaziun dla tecnica dl sonn. Nia ma i musizisć ne vëgn damaná da se adaté ales esigënzes de »musiga a destanza«, mo ince a chi y a chëres che ascuta sö se deurel poscibilités nöies da aldí fora sonns tl corp sonur dla natöra. Le conzert vëgn tigní en domënia ai 2 d'agost dales 10:00 (sce al é bur' tëmp dales 19:30) a La Pli sön plaza de dlijia y a Curt dlungia dlijia. Al sona scolars dla scora de musiga sot a la direziun de Stefanie Watschinger y Markus Erlacher.
Le festival vá inant bele le lönesc ai 3 d'agost dales 21:15 te dlijia de Badia, cun n conzert che ará sciöche protagonisć Lorenzo Ghielmi al orghe de dlijia y Anna Maddalena Ghielmi ala vidora.

Sonns tla natöra
Incuntada de meditaziun y relassamënt cun i sonns dl gong, amesa la natöra a La Crusc
Chësc isté vëgnel metü da jí de plü apuntamënc de meditaziun y relassamënt acompagná dal sonn dl gong, tla bela culissa dla natöra sö La Crusc a Badia. Ara se trata de na sesciun de massaje dl sonn tres le stromënt dl gong, dles ciampanes tibetanes y de d'atri stromënc, che porta i partezipanc te na fasa de meditaziun y relassamënt. Na bona ocajiun por se tó tëmp por se instësc y passé n danmisdé alaleria tla natöra. Le pröm apuntamënt é en lönesc ai 3 de agost pro la staziun a munt dl pröm lift da La Crusc. L'incuntada mët man dales 11:00 y döra chës 2 ores. L'apuntamënt cun i »Sonns tla natöra« sará ciamó n iade le lönesc ai 17 d'agost. Les prenotaziuns al cost de 10,00€ mëss gní fates ti ofizi turistics dl'Alta Badia anter le de denant. L'iniziativa vëgn metüda da jí tl respet dles regoles preodüdes.

»Ester Ladins« tl MMM Ripa a Bornech
33 artistes y artisć dales valades ladines mostra söes operes tl Ciastel da Bornech cina la fin de setëmber 2020
Incër 40 artistes y artisć stá por le tru EPL tla Val Badia che metô man dan 60 agn, da na vijiun de Siur Angel Morlang, prou, artist y scritur ladin, cun l'intenziun da cherdé adöm artistes y artisć dla Val Badia por s'organisé, se motivé, se sostigní y se promöie deboriada y un por l'ater. Les tröpes ativités y mostres che á amarscé n tru che é jü fora por dejens de cambiamënc radicai dla cultura, economia y orientamënc dles vals ladines.
L'ert che é stada por secui n mesum por la difujiun dla dotrina, sostignida da mezenac 'potënc', chir tla contemporaneité na strada nöia, de definiziun individuala, espresciun dla sensibilité personala, defrunt ai fac storics, che vignun de nos vir y testemoniëia. Al romagn prerogativa dl artist, chëra da sintí plü stersc i mudamënc ti tëmps, les finëzes y traversies intravaiades y val' iade stopades ia da na tëra plü o manco sotida. N percurs de pinsiers y sentimënc, rapresentá da passa 30 artisć ladins che tol pert a chësta mostra. Por l'ocajiun á la uniun dl'EPL orü invié ince rapresentanc dles atres valades ladines, por completé na vijiun dl »Ester Ladins, abitanc dles munts«.
Artistes y artisć
Mariana Acuña, David Brandlechner, Albert Crazzolara, Alfred Erardi, Georg Erlacher, Fabian Feichter, Margareth Forer, Gabriele Grones, Franz Irsara, Josef Irsara, Franz Kehrer, Giulia Bortolini, Mattia Maldonado, Albert Mellauner, Markus Moling, Michael Moling, Raimond Mussner, Edmund Nagler, Pepi Pescollderungg, Helmut Pizzinini, Karin Pizzinini, Hubert Prousch, Giovanni Rindler, Lois Rottonara, Simon Rubatscher, Claus Soraperra, Roberta Sottara, Irina Tavella, Guido Tavella, Brigitte Trieb, Jutta Valentini, Christian Verginer, Gustav Willeit

»Cie fossa pa« y la mostra coletiva
Tla Galaria Doris Ghetta a Puntives Sud 8 iel duman dala 17:00 inant la giaurida de doi mostres: una ie »Cie fossa pa« de Arnold Holzknecht da Martin y l'autra ie na mostra coletiva cun artisć y artistes da dloncora
Doi mostres se anconta tla Galaria Doris Ghetta ora Puntives, cun l artista da Urtijëi Arnold Holzknecht da Martin cun la mostra dal titul »Cie fossa pa«, che ie dlongia la mostra coletiva de Eva Aeppli (CH), Robert Bosisio (ITA), Jonas Burgert (GER), Miriam Cahn (CH), Aron Demetz (ITA), Walter Moroder (ITA), Walter Pichler (AUT), Carol Rama (ITA), Eva Schlegel (AUT), Peter Senoner (ITA) y Kiki Smith (USA).
Duman sada ai 1.08. iel dala 17:00 nchin la 20:00 la giaurida dla doi mostres, tramedoves da udëi nchin ai 30.09. for de merdi nchin vënderdi 15:00-18:00.

Cunzert daduman sun Ciandevaves/Pana
N dumënia ai 9 de agost saràl dala 10:30 inant da audì n cunzert sun Ciandevaves/Pana, pra l pitl lech sun l troi PanaRaida
L cianterà la grupa de Gherdëina »Tel Tipes« y l sunerà la grupa »Zeitlous« dla Val Venuesta, che se prejënta cun chitara, didgeridoo y percuscion, dajan nscila vita a n mix de meludies che traspurtea chiche scota su te monc nueves. Gudëve n'ëura alalongia i biei sonns dla mujiga tl chiet dla natura.
Ve aspiton y se ncunferton sun Vo!