Manifestazions atuales speziales

Data

14 de agost 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 14 de agost
»Dance with Fantasy«
Chësc le titul dl conzert da en mercui ai 19 d'agost dales 21:00 tla dlijia da Corvara
Le conzert fej pert dl festival »Transit« de Badiamusica. Da aldí él Agnes Mayr al fabló y Isabel Goller al'erpa
Tl program »Dance with Fantasy« presentëia intrames les artistes döes formes de composiziun, che á albü bele da dagnora incá na gran importanza tla musiga classica. Bal y musiga é liá adöm te na manira strënta. Le bal popolar y le bal de grup ispirëia cun so carater local le svilup dla musiga. Les döes formes d'ert se á influenzé öna cun l'atra tla storia, mo se á ince svilupé individualmënter öna dal'atra. Te chësc program pón aldí bai barocs, portá dant sides te süa forma originara sciöche por ejëmpl pro Bach, pochená ia te na fantasia pro Telemann, co ince interpretaziuns plü tardies pro Karg Elert y Lauber. L'inom »Fantasia« vëgn dant le pröm iade tl 16ejim secul, sciöche titul de n'opera musicala y se referësc a n'adoranza fantasiosa de material musical. »Fantasia« é deventé n toch de musiga, che ne á nia na forma fissa, sciöche chëra de na sonada classica. Tres chësta forma lëdia vëgnel sotrissé l'aspet emozional y espressif dla musicalité spontana. Ince al componist baroch Telemann ti plajô chësta forma de musiga. Virtuosité particolara se damana Fantasies dl tëmp romantich, sciöche la Fantasia por fabló y erpa de Camille Saint Säens o la Fantasia sura temesc fora dl'opera »Faust« de Charles Gounod por n solo dl'erpa. La liberté tla maniera d'espresciun ispirëia les döes musizistes. Ares porta dant n program, olache le publich pó instës se sintí ispiré y joré para söles ares dla fantasia.

Conzert de orghi de dlijia – »flute & organ«
Badia píta dui conzerc de fabló y orghe, ai 20 d'agost a Al Plan y ai 21 d'agost a Badia
Le festival »Transit« de Badiamusica vá inant cun dui conzerc che ará sciöche protagonisć Priska Comploi al'oboa baroca y fabló, sciöche ince Franz Comploi al orghe de dlijia. I conzerc vëgn tignis ai 20 d'agost dales 21:00 te dlijia d'Al Plan y ai 21 d'agost dales 21:00 te dlijia de Badia.
Stromënc a fle y orghe á tres la produziun dl ton y l'adoranza dl material n lian de parentela, proa pö l'orghe da imité cun sü registri i sonns dl fabló. Conesciüdes é les composiziuns por stromënc a tasć de Frescobaldi, che é metüdes adöm da de plü de pices perts de carater y espresciun desvalis (»affetti« y »effetti«). Por via de sües capazités de composiziun straordinares, â sü toc musicai da bal, sües operes de variaziun y les sonades godü de amiraziun. Na manira da fá musiga tratan le tëmp dl renascimënt ê le smendrimënt ad hoc de modei laota conesciüs, che gnô scialdi dala musiga popolara. N original gonot adoré ê le madrigal »Vestiva i colli« de Giovanni Pierluigi de Palestrina o »Ancor che col partire« de Cipriano de Rore. La musiga baroca é caraterisada da n sistem rich de figöres musicales, che corespogn a na retorica musicala y é liada a »afec«. Cun G. P. Telemann y J. S. Bach se á tl baroch tardí i stils musicai da inlaota deslarié sura i confins fora. Di vidorisć virtuosc talians nes él gnü trasmetü na »Ciacona«, che é gnüda dër consciüda. Ince sce l'indicaziun dla fontana de chësc toch n'é nia daldöt tlera, él impó deplü indizi che sostëgn la tesa che Tomaso Vitali sides le componist.

Conzert de Red Canzian a 2.000 m
La munt de Boé sura Corvara i fej da cornisc al conzert alaleria de Red Canzian, mëmber dl grup musical Pooh
Le conzert vëgn tigní en mertesc ai 18 de agost dales 18:00 inant, dlungia la ütia Piz Boé Alpine Lounge. Red Canzian, acompagné dal clavier y sambëgn da so »basso«, portará dant melodies che á caraterisé süa cariera musicala: dai toc de Elvis Presley, Luigi Tenco y i Beatles ales melodies plü conesciüdes di Pooh. Por recordé le gran componist Ennio Morricone podarán ince aldí le toch »Gabriel's Oboe«. L'implant dl Boé resta en chësta ocajiun davert ince da sëra, plü avisa pón jí sö dales 18:00 y gní jö do les conzert incër les 20:30. Implü él ince la poscibilité da sté tla ütia Piz Boé Alpine Lounge a cëna y gní jö spo dales 23:30. Les chertes por le conzert, che tol ince ite le iade cun l'implant, pón cumpré pro l'ofize Alta Badia Summer al Boé a Corvara al prisc de 32,00€ por adulc y 26,00€ por i mituns cina 16 agn. I posć por le conzert é limitá y sce al ess da ester bur' tëmp, vëgn la manifestaziun spostada ai 19 d'agost. Le conzert vëgn organise da Movimënt en colaboraziun cun la Piz Boé Alpine Lounge.

Emilio Comici: »Balarin sun i crëps dla Dolomites«
Ai 20.08. dala 20:30 sun l pra dan l Tublà da Nives te Sëlva conta Carlo Emanuele Esposito dla vita de Emilio Comici. Mujiga de Toni Taschler
L sarà na cuntia teatrela de vita, mprejes y pascions dl arpizadëur triestin Emilio Comici, prejenteda da Carlo Emanuele Esposito.
La Dolomites pòssen se goder te plu manieres: ti cialan, les arpizan o nce les cuntan. Chësc spetacul uel cunté la mprejes dolomitiches de Comici, che à te si ultimi ani de vita vivù te Sëlva, ulache l ie mort mo jëunn per na desgrazia banela. Monologs rezitei y referimënc biografics se mescëida cun ilustrazions y meludies de zacan. Nscila uel la usc che conta splighé la vita de Emilio Comici, si pascion senziera per la Dolomites, si viages, si amisc y amores y si ntraunides tragiches.
Duc ie nviei, la ntreda ie debant.

Museum Gherdëina: vijites menedes debant
Ntan dut l mëns d'agost per festejé i 60 ani dl Museum de Gherdëina a Urtijëi
N ucajion dl'aniverser pitons ntan dut l mëns d'agost, for de lunesc y de vënderdi, vijites menedes debant n con' di espunac che ie bele dal 1960 incà tl Museum: dala 16:00 per talian y/o tudësch (aldò dl publich), dala 16:30 per gherdëina. L ie mé da paië la ntreda, la vijita ie debant.
Duta la publicazions dl Museum ie per l aniverser da giapé a n priesc scialdi plu cuneveniënt.
Unide a descuvierjer y a nriescer cosses nteressantes de nosc pec unics y reres.
Orar de giaurida: lunesc nchin vënderdi 10:00-13:00 y 14:00-18:00; orares straurdineres sun www.museumgherdeina.it (tel. 0471 797554).

»Ladinia Day« a Bornech
Tl MMM Ripa tl Ciastel da Bornech él indoman, ai 15 d'agost 2020, de plu manifestazions dai Ladins y söi Ladins. L program é interessant nia demé per i ghesć
Tla cornisc dla sajon espositiva 2020 dl MMM Ripa tl Ciastel da Bornech con la mostra di 33 artisć dl'EPL– Ert por i Ladins él sun l program indoman ai 15 de agost (feragost y Santa Maria dai Cüfs) l »Ladinia Day« con mujiga y conties, poejies, curs de ladin, referac y juesc. Laprò él vegnù pensé per i pitli a n laboratore che se svilupeia sun la storia y tradizion di pitours y i colours fasciagn, y a cianties y letures plajoules.
L Di dla Ladinia é prevedù da les 11:00 inant con l conzert dla ciantautoura de Fascia Martina Iori y si cater bogn strumentalisć, da les 13:00 él la daurida adum a unions y istituzions culturales ladines che portarà dant enchin da seira de vigni sort di Ladins y de sia storia.
L program se desfirarà enchin da seira da les ot, canche l alpinist Reinhold Messner contarà de sies raisc ladines y de sies esperienzes d'arpizadour fates tles vals ladines. Da les nuef da seira él sun l program la proiezion dl film »Sassolungo«, realisé i ultims agn sot la regia de Reinhold Messner per recordé i 150 agn da la »pruma« dl Saslonch.