Manifestazions atuales speziales

Data

11 de setember 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 11 de setember
Saus dl altonn
Les ultimes döes edemes de setëmber tl'Alta Badia sará caraterisades dal'iniziativa »Saus dl altonn«, che valorisëia i produc locai, les munts y la natöra che vëgn abelida dai corusc dl altonn
Pro cinch üties gnaral pité dai 13 ai 27 de setëmber derzades fates cun n produt local, assegné a chëra ütia y öna dles derzades é stada ideada da n cogo da stëres de Südtirol. Te deplö ocajiuns saral le produtur y le cogo pro la ütia che presënta personalmënter so produt y so tai. Les üties pón arjunje a pe, cun la roda o tolon i implanc portamunt, che sará en funziun cina ai 27 de setëmber 2020. Tartan les döes edemes podaran implö tó pert a ativités desvalies sciöche na escurjiun por jí a ciaré le lové de sorëdl, iniziatives liades al monn dles és, na cercia de vins tratan le florí de sorëdl ai 18 de setëmber, n workshop de fotografia sön Armentara ai 23 de setëmer y por stlü jö la festa »Sonns y saus d'Armentara« ai 27 de setëmber. Deplö informaziuns ciáfon ala plata internet www.altabadia.org y les iscriziuns ales ativités vëgn fates te un di ufizi turistics.

»Ester Ladins« tl MMM Ripa a Bornech
33 artistes y artisć dales valades ladines mostra söes operes tl Ciastel da Bornech cina ai 27 de setëmber 2020
Incër 40 artistes y artisć stá por le tru EPL tla Val Badia che metô man dan 60 agn, da na vijiun de Siur Angel Morlang, prou, artist y scritur ladin, cun l'intenziun da cherdé adöm artistes y artisć dla Val Badia por s'organisé, se motivé, se sostigní y se promöie deboriada y un por l'ater. Les tröpes ativités y mostres che á amarscé n tru che é jü fora por dejens de cambiamënc radicai dla cultura, economia y orientamënc dles vals ladines.
L'ert che é stada por secui n mesum por la difujiun dla dotrina, sostignida da mezenac 'potënc', chir tla contemporaneité na strada nöia, de definiziun individuala, espresciun dla sensibilité personala, defrunt ai fac storics, che vignun de nos vir y testemoniëia. Al romagn prerogativa dl artist, chëra da sintí plü stersc i mudamënc ti tëmps, les finëzes y traversies intravaiades y val' iade stopades ia da na tëra plü o manco sotida. N percurs de pinsiers y sentimënc, rapresentá da passa 30 artisć ladins che tol pert a chësta mostra. Por l'ocajiun á la uniun dl'EPL orü invié ince rapresentanc dles atres valades ladines, por completé na vijiun dl »Ester Ladins, abitanc dles munts«.

Cunties y poejies de Nadia Rungger
Prejentazion dl liber n vënderdi ai 18.09. tla sala dla Lia Mostra d'Ert – Circolo a Urtijëi
La Lia Mostra d'Ert – Circolo à l plajëi de nvië duc ala prejentazion dl liber de cunties y poejies »Das Blatt mit den Lösungen« – La zedula dala soluzions – de Nadia Rungger.
L ie si prim liber, ulache l vën publicà cin' cunties y poejies che à venciù n pest leterer deberieda cun stories nueves, mo nia publichedes, danter l auter nce la storia »Der Dirigent« che à venciù l pest leterer nternaziunel Merano Europa 2017 y la traduzion tl tudësch dla cuntia per ladin »Bon viac«, premieda cun l pest leterer Scribo Junior 2018.
La prejentazion dl liber sarà n vënderdi ai 18 de setëmber dala 20:00 tla sala dl Circolo a Urtijëi sun Plaza de S. Antone, cun la moderazion de Christoph Pichler.

»Multiski« tl invern 2020/21
Le Ski Team Alta Badia inviëia düc i mituns y les mitans dla 1a ala 4a elementara a tó pert ala ativité sportiva »Multiski«
Cari mituns, ëise vëia da se dé jö d'invern cun tröpes ativités sportives söla nëi adöm a üsc amisc y se divertí adöm ai alenadus dl Ski Team Alta Badia? Spo é avisa Multiski le dërt por os!
Nia ma jí cun i schi, mo ince n gromun de atres disciplines sportives podaraste porvé fora, danter l'ater jadiné artistich y hockey, snowboard, freestyle, paslunch y telemark.
Dötes les informaziuns por ci che reverda le program y la modalité de iscriziuns ciafëise söla plata
Facebook dl Ski Team Alta Badia o al numer 339 2975690 (Martina).

Cursc da jadiné
L'Ice Club Alta Badia organisëia cursc da jadiné por prinzipianc y progredis
L'Ice Club Alta Badia pita indó cursc da jadiné por mituns y mitans dai 4 agn insö. I cursc jará inant por zirca 3 mëisc. Le curs por i mituns che sá bele n pü' da jadiné mët man ai 21 de setëmber dales 16:00 y jará inant vigni lönesc y/o vigni mercui dales 16:00 ales 16:45. Al é la poscibilité da fá un o dui iadi al'edema.
Le curs por i prinzipianc vëgn tigní un n iade al'edema. Por i plö pici (mituns dla scolina) mët man le curs en jöbia ai 24 de setëmber y jará inant tres la jöbia dales 15:30 ales 16:15. I plö gragn, aladó dl numer de scric ite, gnará partis sö danter lönesc y mercui, tres dales 16:00 ales 16:45.
Le cost dl curs é de 110,00 euro por un n iade al'edema y de 180,00 euro por dui iadi al'edema. Düc i mituns y dötes les mitans che á vëia da jadiné dess s'anunzié. Le numer de partezipanc é limité. Por l'iscriziun y por informaziuns prëibel cherdé sö o scrí, anter i 18 de setëmber, al numer de telefon 333/2930586 (Renate).

Lites de comun
Sëres de informaziun y discusciun
Le Sorvisc ai Jogn Val Badia mët a jí tl comun da Badia y te Mareo na sëra de informaziun y discusciun cun i candidac da ombolt y i candidac de vigni lista sön temesc comunai che reverda la jonëza y la comunité.
Termins
Comun de Badia: en mertesc, ai 15 de setëmber dales 20:00 tla Ciasa dla Cultura a La Ila (max.170 porsones). La manifestaziun vën ince tra­smetüda dal vi tres streaming sön https://www.facebook.com/saj.valbadia
Comune de Mareo: en vëndres, ai 18 de setëmber dales 20:00 te palestra dla scora a Al Plan.
La moderaziun: Diego Clara.
Döta la popolaziun é bel inviada a tó pert!
Terza edizion dl Dolomitale Filmfestival
Dai 22 nchin ai 27 de setëmber
Tla Cësa de Cultura a Urtijëi uniràl inaugurà n merdi ai 22 de setëmber dalal 20:00 l filmfestival Dolomitale cun l film »Pinocchio« te chël che l scultëur de Urtijëi Bruno Walpoth zipla l mut de Gepetto.
Sun la plata internet »dolomitale.com« iel da pudëi apusté danora la chertes y nce da udëi l program di films che unirà mustrei.
Nsci nce i film che vën prejentei per l cuncors per l miëur documenter che à da n fé cun l raion dla Elpes, sciche miëur film curt de Südtirol o di »Young Guns«, pratica­mënter de jëuni che à scumencià da permò a se dé ju cun l film.

Nodé y atletica por mitans y mituns 2020/2021
Badiasport pita ince en chësc altonn deplü cursc
Oste imparé da nodé, bun? Te sál massa püch da sté ma sura ega ia?
Por prinzipianc, 1a-4a classa elementara
Badiasport organisëia indó n curs da nodé por prinzipianc por les mitans i mituns dala 1a ala 4a classa elementara. Le curs vëgn tigní vigni mercui domisdé (15:00 – 17:00, dui grups) tla nodadoia da La Ila por la spana de tëmp da otober cina ma. I plö gragn (3a y 4a elementara) pó ince tó pert al'atletica dla jöbia. L'iscriziun á da gní fata cun le formular söl sit www.badiasport.org (iscriziuns por e-mail o telefon ne gnará nia tutes en conscideraziun). Ince les mitans y i mituns che á tut pert bele l'ann passé mëss scrí fora le formular.
Oste imparé düc i 4 stii y magari ince la ota?
Alenamënc, 4a classa elementara cina ala 3a mesana
Nodé y atletica por mitans y mituns
Badiasport mët indó a jí cun otober alenamënc da nodé y atletica por mitans y mituns dala 4a classa elementara cina ala 3a mesana. Al vëgn insigné i stii lëde, spiné, arosch y delfin. Le training de altetica lisiera alza fora les capazités de coordinaziun y de condiziun, al vëgn ince insigné les formes de basa dles disciplines singoles de atletica lisiera. Nodé vëgn tigní vigni lönesc tla nodadoia da La Ila, l'atletica lisiera vigni jöbia tla palestra dla scora mesana da La Ila por la spana de tëmp otober cina ma. L'iscriziun á da gní fata cun le formular söl sit www.badiasport.org (iscriziuns por e-mail o telefon ne gnará nia tutes en conscideraziun). Ince les mitans y i mituns che á tut pert bele l'ann passé mëss scrí fora le formular.
Nodé por adulc 2020/21
Por les olimpiades ne pordujunse nia, mo i sun sön la bona strada
Cun otober mët indó man »Nodé adöm – nodé por adulc«. Al vëgn insigné i 4 stii lëde, spiné, arosch y delfin, y mioré la coordinaziun y la condiziun. Le curs vëgn tigní tla nodadoia da La Ila vigni mertesc por la spana de tëmp otober cina ma. Al ne se trata nia de n curs por prinzipianć, porchël vëgnel damané les capazités de basa dl nodé.

L'iscriziun mëss gní fata cun le formular söl sit www.badiasport.org (iscriziuns por e-mail o telefon ne gnará nia tutes en conscideraziun). Ince chi che á tut pert bele l'ann passé mëss scrí fora le formular. Chi che á bele partezipé l'ann passé al curs á, sciöche vigni ann, la prezedënza.
19:30-20:30 pröm grup
20:30-21:30 secundo grup

Mostra »Ravises«
Per l'ucajion di 100 ani dl Circolo – Lia Mostra d'Ert
La mostra ie nasciuda cun la ntenzion de abiné adum te na culezion lëures de na gran cumpëida di artisć, che ti à scincà n'opra d'ert al Circolo. Perchël saràl tla mostra »Ravises« da udëi lëures storics dl archif dl Circolo, opres che reprejentea la storia dla Lia Mostra d'Ert.
Opres... Uriginn... Lecurdanzes... Identità... ie propi sciche la ravises de n lën, fundamenteles, les dà sustëni y nutrimënt. Ëiles ie la cunescënza de nëus nstësc, l liam tl scumenciamënt, la ulentà de crië zeche che resta. L ie de gran mpurtanza a les cunëscer y les dé inant, deberieda cun stolz de les avëi.
La giaurida dla mostra sarà n sada ai 19.09.2020 dala 18:00, cun ntroduzion de Carlo Mussner. L sunerà danterite Marion Moroder.
La mostra resterà davierta nchin ai 4.10. uni di dala 10:00 – 12:00 y dala 17:00 – 19:00. De lunesc iela stluta.