Manifestazions atuales speziales

Data

27 de november 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes tla edizion dl 27 de november
Taca i corsc del Ski Team Fascia
Ai 7 de dezember se taca col paslonch e dò con brea, schi e freestyle. Enscinuazions per i 30 de november
L Ski Team Fascia no zet e l fèsc sia atività pur con vèlch mudament per la situazion sanitèra senestra. I corsc de paslonch per i bec nasciui dal 2010 al 2017 i taca ai 7 de dezember e i é debant, ence con fit de la massarìa. I etres corsc tacarà ai 12 e ai 15 de dezember per jir inant fin de mèrz.
Se se cognessa fermèr o sburlèr i corsc, vegnarà comunicà sobito i mudamenc sun dates e cost.
Per schi e brea vegn fat n rebas per i bec che aea fat i corsc la sajon passèda. L 50% l'é da paèr dant dai 10 de dezember, l rest per i 15 de firé. De gra a la colaborazion con i impianc del Consorzie Lift Val di Fassa e Trentino i bec pel aer l Skipass a priesc rebassà. Se pel se scriver ite fin en lunesc ai 30 de november. Per l paslonch l'é da chiamèr te ofize del Ski Team al 0462 764111 dal lunesc al vender (h. 9:00-11:00 e 16:00-18:00) o manèr na mail a info@skiteamfassa.it. Per i etres corsc se troa l formulèr per scriver ite ogne bez sul sit www.skiteamfassa.it, olache l'é ence duta la informazions.

Fora por l'Advënt cun la Uniun Teater La Val
La Uniun Teater La Val pîta tles domënies d'Advënt na iniziativa particolara, sön Youtube y Facebook
Vigni domënia d'Advënt ves aspeta la Uniun Teater La Val cun n pice video sön sü canai Youtube y Facebook. Plü avisa les domënies ai 29 de novëmber, ai 6, 13 y 20 de dezëmber, dagnora dales 17:00 inant. Al é n invit da nes archité y sté n püch adöm, serenamënter – ince insciö, te chësta maniera, aladô de chësc tëmp. Nes godun n per de menüc cun stories, rezetes de checs y pinsiers lomi­nusc. N bun Advënt!

Aurela cörta musicala
N proiet cultural/musical online, por chi che n'ó nia lascé passé ia l'Advënt zënza sonns y melodies.
33 live-streams, 12 referënc y musizisć, 660 menüc de iodler, dudel y johlen. Chësc é le proiet »Beste Zwischenzeit«, nasciü spontaneamënter da Markus Prieth da Lana, por porté ite n pü' de musiga te chësc Advënt tan particolar. De ci nen vára pa? Dai 25 de novëmber cina ai 22 de dezëmber vëgnel pité live-streams de 15 cina 30 menüc. Chiló él 11 ciantadus y ciantarines da Germania, Austria, Svizera y Südtirol che pîta debann cursc y na cercia de süa ert. Al gnará cianté, iodelné y tan d'ater. L'apuntamënt é vigni de dales 18:00 ales 18:30 sön la plata internet www.markusprieth.com . Le stream sará da odëi cina a n'edema dedó. Informaziuns plü menüdes ciafon ala mail contact@markusprieth.com o al numer de fonin 331 4806162. Le proiet »Beste Zwischenzeit« vëgn finanzié cun spënores. Le numer de cunt ciafon ince sön la medema plata internet.

La Val slomina tla nöt
N calënder d'Advënt particolar slominará tres deplü fora por paisc, y sará spo da odëi cina en Santaguania
En chësc ann vëgnel metü da jí a La Val na iniziativa particolara fora por döt le tëmp d'Advënt y da Nadé. Le paisc i fajará da cornisc a n calënder d'Advënt spezial, tres les löms dles finestres dles ciases. Dal 1. dezëmber inant gnarál vigni de daurí simbolicamënter na finestra dl calënder d'Advënt, iluminan dales 17:00 inant na finestra implü dles ciases tl zënter dl paisc. Ai 24 de dezëmber sará dötes les finestres dl calënder iluminades y chëstes podará gní amirades cina ai 6 de jená. Tl scür dla sëra podarán s'la spaziré fora por le paisc y odëi les beles löms y i corusc pro les finestres dles ciases y sintí insciö l'armonia dl Advënt. Le percurs dl calënder d'Advënt pëia ia dal zënter de paisc por jí cuntra la strada Pares y rové spo zoruch tl zënter.

Na gherlanda d'Avënt a ti
La »Jungschar« de Urtijëi à inò fat gherlandes d'Avënt da vënder
L marcià da Nadel dla Jungschar de Urtijëi, che ie bele dai ani na tradizion, ne unirà chëst ann nia a s'l dé. Inò à la pandemia purtà pro a vel' problematica per na lia. Mpo ti iesen stai manëcia y à abinà na soluzion.
La gherlandes vën nce chëst ann fates cun gran pazienza y lezitënza dai acumpaniadëures dla Jungschar. A chiche n aposta una, ti vëniela meneda diretamënter a cësa al plu tert doduman dumënia danmesdì, per la prim dumënia d'Avënt. Una na gherlanda costa mé 20€, paià vëniel sun l mumënt.
Per chiche ie nteressà, tléchel cherdé su l numer 333 1660450 o ti scrì ala Jungschar sun Instagram, lasican inuem, adres y numer de telefonn.