La Usc di Ladins

Saon duc coche la é fata: biencia, freida, molejina, che doucia la vegn jù dal ciel da d'invern, che duron a jir coi schi e a fèr i popes te piazal: la neif! Purampò co se formel tel ciel chest polver bianch che rua su la tera?

Dant de dut, serf tel ciel na nigola e chel che per talian se ge disc n »germe cristallino«, na picola partizela solida, desche l polver, i PM10, ma ence zeche de organich: zenza chesta picola, ampò muie ùtola, partizela, la neif la se formassa a -40°C, enveze che a -10/20°C descheche sozet per sòlit.

Dut intorn a chesta partizela, che no la croda jù su la Tera percheche la peisa massa pech, se taca mingol a l'outa molecoles de èga che passa da esser vamp, gas, a esser giacia, solid, fajan l valif prozess per la formazion de la broja sui pré da doman: l vamp l solidifichea doentan broja, chesta fossa la sublimazion.

A forza de se solidifichèr, l'èga la forma i fioches de neif, aldò de la temperatura e l tumech daìte la neif pel formèr i renomé cristèi de giacia con sie pontes o cristèi a forma de zelinder o de n lonch fil. Cò i rua a esser assà pesoches per crodèr su la Tera, i se destaca da la nigola e i scomenza a crodèr a na vida doucia e maraveousa.

Te noscia val e su nesc monts purampò no rua semper, per no dir beleche mai, chisc perfec cristèi dalajà che, tel passèr da la nigoles su la tera, la temperatura la pel se uzèr e chi bie cristèi simetrics che vedon te vèlch foto i se delega e i va a se tachèr un co l’auter crepan chel perfet e prezis equilibrie che l’é te vigni cristal formà a partir dal »germe cristallino«.

Podede lejer dut l'articol su la Piates di Joegn de La Usc stampèda de vender ai 27 de mèrz. 




 (Lorenzo Riz)