Dedò la quintes: che velel pa dir spilenèr?

Data

18 de auril 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Aon rejonà con Pietro Riz da Ciampedel en cont de sie percors tel mond del teater con La Mizacoles.

N bel salut Piere! Ne contasseste zeche en cont de tie percors tel mond del teater?
Ben segur. Mie inom l’é Pietro Riz, son da Ciampedel e é 28 egn. Da cater egn fae pèrt del grop de teater de Ciampedel La Mizacoles. Me à semper sapù bel l teater enceben che mia mère e mie père no i sie mai stac trop engaissé. Tanta jent, beleche duc, i me disc che ié n’é ite de mie iaf rechia Paul de Federico, ajache ence a el ge saea bel fèr mèscres e comedies. Dut l’é tacà acà cater egn, canche Filippo Favé me à domanà se me aessa sapù bel fèr pèrt del grop de la Mizacoles e ié g’é responet sobito de scì. Belimpont dò n par de dis l me à chiamà a me dir che i era dò a enjignèr na comedia per la sègra, ma ie mencèa n personaje. Dò dotrei dis son jit sun senta de La Mizacoles, olache i se troèa a fèr proes. I me à dat n copion de la comedia che i era dò a indrezèr. Ié me la é leta sobito jù e g’é dit: »Va ben, son un di vesc!«. Nience a fèr a truz i me aea dat la pèrt de l’ator prinzipèl. Cogne dir che te chest grop de teater me é semper troà n muie ben. Duc i componenc i é n muie gustegoi e a la dir duta ence mingol soné. Indèna la proes sin grigon semper na schena.

Co te senteste sun paladina?
Canche l’é ora de jir sun paladina, sion duc semper mingol agité percheche l cruzie più gran l’é chel de se desmentièr la pèrt. Per esser bogn de creèr n bel leam sun paladina l’ator no l cogn demò saer sia pèrt ma ence chela de chi etres. Manco momenc vec l’é te anter na batura e l’autra più la situazion la somea reèla.

Che velel pa dir per te fèr teater?
Per me spilenèr vel dir fèr stèr ben na persona. Canche na persona la grigna, vel dir che la stèsc ben te chel moment, la se desmentia i cruzies, i burc pensieres e la se fèsc na bela grignèda. Ié me peisse e me sà de veder che a jir a comedia l’é na bona pèrt de jent de età. Pèrto mia, chesta jent la vegn proprio percheche la sà che la se farà n muion de grignèdes e, enceben se demò per n’ora o doi, te chest moment ie sà de renascer.

Podede lejer duta l'intervista su La Usc stampèda de vender ai 10 de oril 2020. Se enveze volede ve vardèr vèlch comedia spilenèda dai atores fascegn, endèna podede l fèr sul web, sul canal Youtube de TVLadina te la sezion “Vic e ac".

 (Nicoletta Riz)