La Usc di Ladins

Te la situazion de emergenza che sion dò che vivon, che à domanà che beleche duta la ativitèdes vegne serèdes, la Scola Ladina de Fascia se à ativà sobito per ge fèr front al besegn de arsegurèr la continutà didatica da dalonc a si scolees e si studenc, da la populères a la scola auta.

Per chel che vèrda la scolines ampò, timpruma no l’é pontà via nesciuna scomenzadiva istituzionèla ence percheche la ensegnantes fin ai prumes de oril no les era en servije. Ampò bele prest les à tacà de spontan a tegnir i prumes contac con si bec, magari ence demò con n messaje sul fonin.

N’outa che la ensegnantes é states da nef en servije aon tacà desche coordenament pedagogich a ge dèr mingol de forma e ence dotrei regoles a chesta scomenzadiva, tel respet de la normativa su la privacy – à dit la responsabola Tatiana Soraperra.

A la fin de oril i genitores é stac enformé che sul sit de la Scola Ladina l’é stat avert na sezion dedichèda a la »proponetes educatives da dalonc« per i più picoi, olache l’é na vedrina virtuèla con ite materièi che la ensegnantes de la scolines provinzièles ladines de Cianacei, Pera e Soraga à manà, dapodò l’é ence n link de azess al portal de la scola trentina Vivoscuola, per poder jir a ge dèr na veièda ence a la proponetes de autra scolines.

De più su La Usc stampèda de vender ai 8 de mé 2020.

La ensegnantes se à dat jù per sporjer proponetes gustegoles che vegn manèdes una o doi outes en setemèna, semper ti medemi dis, a na vida che i bec posse se spetèr l messaje da la scolina.   (Cristina Marchetti)