La Usc di Ladins

I studenc de la clasc quintes di trei licees de la Scola ladina de Fascia i é dò a se verteèr a la neva matura. N ejam istouta deldut desferent, che aur i ujes a nesc joegn sul mond di gregn. Aon rejonà con trei studenc, Alessandro »Cici« Chiocchetti del liceo scientifich, Elena Pellegrin del linguistich e Alice Stroppa de l’artistich, per entener miec sia spetatives e la dificoltèdes.


Co siede pa dò a viver chest temp fora de anter?

Cici: Giö de segur no desche inant. Da bonora aon semper le videolezion con la scola e domesdì arcedament e doeres… me passe via la giornada.

Elena: Con mingol de preocupazion. Me sente schiciada e te perjon. No son usada a chisc ritmes. Son cruziada che chesta roba la vae inant amò n muie. No veide più nesciugn de mie amisc.

Alice: Desche studenta, cogne dir che no l’é stat sorì se endrezèr a chisc neves ritmes e a vides de studièr e ensegnèr desferentes, soraldut ades che nos aon la matura. Aboncont son segura che duc à fat sie miec per ne didèr e n’outa che se à entenù i mecanismes de chest endrez l’é doventà dut più sorì.

Co éla dò a jir co la scola?

Cici: La scola la é più senestra che dant. No se pol aver chel confront coi professores. Fajon scì le videolezion, ma giö no me troe tant ben con chesta idea de scola.

Elena: La é dò a jir belebon, enceben che fae fadìa a star dut l dì sun computer a far doeres. De solit, a studiar stae a l’aria averta. Canche jìe a scola, jìe a pe… me mencia proprio esser ledia. Me par che me mencie l’aria.

Alice: Stèr a cèsa, ence se al scomenz l’era senester, me à didà a me conzentrèr mingol de più sul studie. L me à ensegnà l bel de stèr chiec per mingol e troèr endodanef l bel, per ejempie, tel lejer n liber, stèr con tia familia o cojinèr. Tanta robes che col jir coran del mond me é desmentià de aprijièr.

Se pel lejer duta l'intervista su La Usc stampèda de vender ai 8 de mé.

 (Nicoletta Riz)