La Usc di Ladins

Bun de Lena, co te vara pa? Co te presentëiste pa ai leturs de La Usc di ladins?
»Bun de, ara me vá dër bun, de laur feji l'insegnanta de franzesc tl Lizeum linguistich a La Ila y te chësc tëmp sunsi en vacanza. I sun de Badia, mi laur me sá dër bel y al m'á dër mancé i ultims mëisc, olache an ne podô nia jí a scora.«

En chësc ann é sté l'ejam de maturité bindebó atramënter?
»En chësc ann él sté n gröm de punc de domandes por l'ejam de maturité, i insegnanc adöm ai scolars á messü se arjigné ca a val' de nü. I l'ún fat tres les video-leziuns. L'ejam é jü dër bun, mo an á odü che ai scolars ti ál mancé le tëmp por stüj jö la cariera scolastica indortöra: jí á se bëre valch düc adöm y ince la comunité de scora, inanter compagns y insegnanc. L'ejam é impó sté ri, al é ma sté a usc, olache al gnô damané fora dötes les materies che é gnüdes trates fora en chësc ann.«

Ultimamënter án messü ti dé gran pëis ala tecnologia?
»An á odü ci gran importanza che la tecnologia á, zënza chisc mesi ne fósson nia stá bogn da porté inant la scora. Al é de gran aiüt. Do mia minunga á les scores dessigü capí che an pó lauré deplü cun i media, ai vá dër bun sce valgügn stá demez da scora por sport o maratia. Mo i sun ince dër sigüda che n computer ne podará mai ti tó le post a l'insegnamënt en presënza. Le contat, se ciaré ti edli y le sté adöm fej fora dër tröp.«

Deplù te la edizion dl 17 de messel