Medaes ladines tel SBX!

Data

22 de fauré 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
A Colere se à dejout doi garejèdes de Copa Tèlia de Snowboard Cross. Fascia e Ampez se vadagna medaes.

Te la provinzia de Bergamo, con la regìa del Scalve Boarder Team, se à dejout na neva tapa de Copa Tèlia per l Snowboard Cross sul nef portoi permanent de Colere. Desche zenza, does la giornèdes de snowboard con beleche 200 atlec rué da 15 nazions desvalives.

Ai 7 de firé l'é stat la pruma proa con la garejèda tant di omegn che de la femenes. Vitoria talièna anter i omegn, con l clasc 2001 Devin Castello che se à portà per prum al travert te la gara de cèsa. L'atlet de la Nazionèla B l'à batù doi si conscric, l rus Danil Donskikh ruà secondo e l franzous Guillaume Herpin ruà terzo.

Na bela neva la é ruèda ence da la corsa resa, ajache l'atleta fascèna Caterina Carpano se à vadagnà l prum podie sajonèl. La snowboarder de la squadra de Copa Europa la se à vadagnà la medaa de bron ruan al travert dò la russa Yulia Lapteva, òr, e l'atleta de Andorra Estevez Maeva, arjent. Te la medema proa à fat festa ence l'ampezèna Ester Gross, con n bon 5° post che ge à fat vadagnèr 90 ponts FIS.

Gran piazament ampezan ence te la categorìa Ragazzi, con la venta de Luca Apollonio. Anter la eles venta de Manuela Viviani, con i suzesc enveze te la categorìa Allievi per Alessio Migliucci e Fanny Piantanida.

La proa se à repetù dapodò ai 8 de firé. Te la seconda giornata de garejèdes Fis de Snowboard se à confermà la bona forma di atlec de l'Est Europa, tant ti omegn che te la femenes. L ceco Jan Kubicik l se à portà a cèsa la medaa de or anter i omegn, con l rus Andrej Anisimov a se vadagnèr l'arjent. La Tèlia se à aboncont fat vedèr sul terzo sciaer del podie, de gra a la proa de Tomas Belingheri.

Tripleta russa enveze anter la eles, con Yulia Leptova, Kristina Paul e Alessandra Parshina a depenjer l podie de brun, bianch e ros. L'atleta ladines se à aboncont vadagnà piazes de nonzech ence te chesta seconda giornèda, con Caterina Carpano loghèda al 5° post assolut e Ester Gross giusta tedò en 6^ piaza.

Te la categorìes mendres l'é stat la confermes di ejic rué 24 ores dant, con l'ampezan Luca Apollonio amò n'outa prum te sia categorìa.

Dassen positif l bilanz de la doi giornèdes de Colere, coi compliments che ge va tant al club de endrez che al Comitat de Bergamo. Positif ence l bilanz di resultac taliegn, soraldut de gra ai atlec ladins che se à vadagnà medaes e posizions de nonzech.


 (Daniele Verra)