La Usc di Ladins

Ince por le Freeride Word Tour él gnü la fin sforzada, l’ultima tapa tles nëis da Verbier tla Svizera é gnüda desdita. A chësta manira se porta a ciasa Arianna Tricomi che abitëia danter Corvara y Desproch le titul de campionëssa mondiala dl jí cun i schi plü estrem al monn. Al é le terzo ann consecutif che la ladina se porta a ciasa chësc titul tan chirí y aprijé al monn. Ara i fej n gran onur al’Alta Badia y ala Talia che passa de bur tëmps por le coronavirus.

Arianna Tricomi é da plü agn la reína ladina di sporc invernai, y ara nes dará ciamó inant n gröm de sodesfaziuns.

Tricomi stlüj jö la sajun cun indöt 24.000 punc, che se mët adöm dala devënta rezënta de Fieberbrunn tl’Austria (10.000 punc) y dai secundi plazamënc rl resort Hakuba tl Iapann (7.000 punc) y tl raiun dles munts de Kicking Horse tl Canada (7.000 punc). La sesta posiziun tla gara söles munts de Arcalís tl Stat d’Andorra ti á assegné 1.680 punc, che ne cunta nia por la classifica finala.

La stëra da cater pizes

L’atleta Arianna Tricomi é deboriada cun Michela Moioli (snowboard cross), Federica Brignone (schi alpin) y Dorothea Wierer (biatlonn) na piza dla "stëra feminila" tl agonism de chësc invern che n’á nia podü se soné fora naturalmënter cun le deleghe dla nëi, mo á messü gní taié ia denant.
La stëra lomina dassënn y é n simbol de forza dles ëres y dla capazité da tigní bot ales desfides! Ince i bugn resultac dal sport porta speranza y confort, y tl entusiasm n destach da vigni tëma!  (Iaco Rigo)