La Usc di Ladins

L'é n picol toch de Fascia che à lascià la val per ensegnèr l bal sui feres utró. Sion dò a rejonèr de Viviana Felicetti e Monica Bernard, doi arcedadores che les se troa per lurier a Corvara, vin Badia. Aló, te l'Ice Club Alta Badia, la doi fascènes ensegna a bec e bezes da duta la val, da Colfosch enscin al Plan de Mareo, amò apede ence a atlec che vegn da Rèba de gra a la vejinanza.

Con l'istà che vegn Monica scomenzarà sia 3^ sajon te la sozietà badiota, Viviana enveze la 5^: "Laore a Corvara da passa 4 egn – la ne à contà chest'ultima – olache ensegne Fegura, ajache chiò aon ence l Sincro, a atlec de ogne età, da l'aviament escin a 18 egn zirca. Dant de ruèr chiò é lurà te Fascia, ma é abù ence na esperienza te la val de Non: aló me troèe n muie ben, ma dapodò me é pissà de me trèr mingol più apede cèsa. Chiò te Badia é troà n Club con voa de crescer e lurèr con gran entusiasm e chesta l'é stat na spenta en più per me fermèr".

Monica se à spostà enveze vin Badia dò na longia cariera te Fascia olache l'à tant garejà che ensegnà, chierian neva esperienzes e se ferman dapodò tel Club olache la se troa dassen delvers. Tant ela che Viviana ne à contà de la senestra situazion leèda al Covid-19, col stop che à fat serèr sù la sajon dant del temp e te n moment critich. L decret che à dit bèsta al sport e al bal sui feres l'é ruà te n temp fit de garejèdes, canche fossa stat tant cheles di campionac che cheles de calificazion a la competizions nazionèles. "Ampò nesciugn se pissèa che l stop l fossa tant lonch e chest virus tant pericolous – à dit Monica - duc speraane che fossa stat vèlch che aea da passèr coran. Tinùltima aon capì che l'era da se armèr de gran pazienza e reagir a vèlch vida. Coscita aon dezidù de limitèr i dans de chesta paussa agonistica, ge dajan a nesc atlec alenamenc setimanai da fèr a cèsa tant dal pont de veduda atletich che del bal. Sion en contat con ic con video e foto, de grazia che l'é la tecnologìa".

Seguramenter l bal sui feres l'é n sport che à de besegn de gran costanza te l'arcedament. N stop de 3-4 meisc pel esser n gran dan e, tel moment de tachèr da nef, sarà l besegn de recuperèr chel che se à perdù e fèr n pas endò dant de poder partir con neves programes. "Seguramenter la programazion cognarà esser veduda da nef – à dit amò Viviana – ma ge vel bele se la meter via, ence perché l'é robes più emportantes. L l’à capì la sozietà, les l’à capì la families, duc aon entenù la serietà de chesta manacia, la sanità vegn dant de dut, dapodò faron l possibol per se miorer con amò maor motivazion".

De più su La Usc stampèda de vender ai 10 de oril 2020.




 (Daniele Verra)