La Usc di Ladins

Chest an i Falcons à fat n gran saut inant ti resultac, veste dèr n bilanz de la sajon?
Diego Iori: La sajon la é jita n muie ben, aon jià delvers e i joegn i é cresciui n muie. Ne à endespiajù de no aer arjont i playoff ence se fosc i assane merité, ma l sport l'é coscì e ogne tant l'é crudeil. Ne é mencià mingol de esperienza te la partides clou, ma la sajon resta positiva.

Ai 11 de mèrz Matjaž Rakovec, president del Board of the Governors, comunica che la sajon de Alps Hockey League fenesc per Coronavirus zenza l'assegnazion del titol...
Nos aane jà fenì nosc campionat al scomenz de mèrz zenza azess ai playoff, ma en generèl l'é stat n gran shock saer che duta la competizions sportives les fossa states lascèdes sù per chest teribol virus. L'é stat zenz'auter n burt colp ence per i fan de l'hockey che no i à podù se goder la fin de l'AHL.

Dò de aer beleche arjont n gran travert chest an, peisseste che podarede fèr amò miec te la sajon che vegnarà?
Per endèna l'é senester programèr, se cogn pissèr dant a chest virus, no se sà nia de coche se pontarà de nef via con la vita. Peisse che i goergn ades no i peisse a endrezèr campionac, vegn dant la sanità. Canche sarà più calma e la situazion sarà miora se podarà se troèr e meter jù zeche per la sajon che vegn.

A livel individuèl t'ès fat 33 ponts (15 gol e 18 assist) te 44 partides: este sodesfat de chel che t'ès fat su la giacia chest an, ence aldelà di numeres?
No son un che vèrda tant a la statistiches e a la sodesfazion personèla, ge vel semper vardèr coche va la squadra. Son segur de aer fat dut chel che podee per i Falcons e de chest son content. Ades vardaron de se enjignèr de nef delvers per chel che à da vegnir.

Anter i Falcons n muie de neves jiadores à fat delvers: èste troà n feeling particolèr con valgugn?
Na, vae d'acord con duc. Ajache son un di jiadores con più esperienza vèrde de tirèr ite duc te la squadra, de esser n pont de referiment per i joegn. Su la giacia l'é doi egn che jie en linea con Martin Castlunger, con el me troe n muie ben, dapodò no sé se ence el l la peissa coscita...

De più su La Usc stampèda de vender ai 24 de oril 2020.

 (Daniele Verra)