La Usc di Ladins

La Federazion Talièna di Sport da d’invern, spetan de aer referimenc segures su canche se podarà endò peèr via l’atività, la vèrda inant e l’à ofizialisà la squadres nazionèles per l setor del schi alpin per la sajon da d’invern che vegn, che erà sie moment de maor emportanza coi campionac mondièi vin Ampez dai 7 ai 21 de firé 2021.

La comunicazion é stata data dal president Flavio Roda endèna la Consulta con i presidenc de duc i Comitac de la Tèlia e i componenc del Consei Federal.

La squadres à vedù na riduzion di numeres respet a l’an passà – l’é stat dit - con l’obietif de pontèr a la calità piutost che a la cantità e tel medemo temp de valorisèr l lurier di Comitac teritorièi.

La squadra nazionèla tol ite 4 atlec fascegn: Stefano Gross del Grop Sportif Fiamme Gialle e Federico Liberatore del Grop Sportif Fiamme Oro, duc doi tel Grop de Copa del Mond de ic per la disciplines tecniches; Monica Zanoner de l’Esercito tel Grop de Copa Europa e Amelia Rigatti di Grazia del Ski Team Fascia tel Grop sot osservazion per la disciplines asveltes.

Apede ai schiadores l’é ence 4 tecnics: Stefano Costazza del Ski Team Fascia Arcedador del Grop de Copa del Mond per la disciplines tecniches, Davive Verga, semper del Ski Team Fascia, Preparator atletich del Grop de Copa Europa, Angelo Weiss de le Fiamme Gialle Arcedador del Grop Junior e Federico Rauco del Ski Team Fascia Skiman del Grop Junior.

Endèna i atlec à podù tachèr a se alenèr a livel individual con la regoles generèles che descomana assembramenc e perveit la distanza personèla ma la FISI é dò a concordèr con l Minister del Sport la linies vida per jir inant ence per i Comitac regionèi e i Schi Club.
Per chisc ultimes l’é stat pissà a vèlch azions de sostegn che l’é de besegn, acioche i posse tachèr jà de jugn coi tesseramenc per la sajon da d’invern e ence a mesures desche l rembors de la quotes de enscinuazion per la garejèdes che no l’é più stat possìbol endrezèr.



 (lg)