La Usc di Ladins

La Marcialonga Craft no se à petà jù e, per scombater l virus che obliga a descancelèr duta la manifestazions sportives, l'à dezidù de doventèr »virtual« tel chèder de n zircuit envià via dal team »Endu« e che l conta ence autra trei garejèdes a completament del Endu Virtual Granfondo: la Virtual GF Gavia e Mortirolo, la Virtual GF La Fausto Coppi e la Virtual GF Sportful.

Coscita donca, la 14^ edizion de la Marcialonga Craft, che aessa segnà l record de enscinué a quota 2.000, la se à tramudà te na neva ocajion, na neva esperienza per i pascioné de la roda: zenza meter l nès fora de cèsa, i atlec à podù comedèr la roda soravìa n »smart trainer«, èrc che dèsc l met de jir con la roda te cèsa zenza se spostèr, e de gra a n filmat i à podù ge jir dò al percors de la garejèda. I smart trainer i é bogn de dombrèr la potenza, la cadenza e la velozità de n atlet e coscita, en vender prum de mé, con duc i partezipanc biné ensema tras computeres, tablet, smartphone o Apple TV se à podù dèr vita a la competizion virtuèla. La manifestazion é stata manèda fora in live streaming, con speaker, comentadores (ence l moenat Cristian Zorzi, che tinultima no l'à coret) e adertura 30 mila followers che à volù osservèr dai schermes l'ejit e i panorames de chesta particolèra Marcialonga Craft: de gra a Endu, sui monitor di partezipanc e di spetatores se à vedù l percors filmà da pech, duta la indicazions tecniches de distanza, altimetria, velozità e dificoltà.

De più su La Usc stampèda de vender ai 8 de mé 2020.

 (Daniele Verra)