Le "coronavirus" á atoché ince i campionac dl palé, che é gnüs tignis sö, tan che an n’á chësta aisciöda nia plü podü soghé le rode de retüda. Insciö él gnü fat fora che i campiuns d’invern ê ince davagnadus dl campionat. Tl rode C dla secunda categoria él indere n caje unich: campiuns d’altonn é le Valdaora y la Val Badia, che á intrames 19 punc. Al terzo post él le Mareo, che á 18 punc, mo na partida demanco, o dit miú: mesa na partida demanco. Ai 3 de novëmber â le Mareo soghé cuntra le San Laurënz. Indere: deache al ploiô tan dassënn, án sospenü la partida al 57 menüt, cun le Mareo che davagnâ por 1 a 0. I ultims menüc ésson orü soghé ai 13 de novëmber a Valdaora, madër che iló él gnü la pröma gran novera, porchël n’éra nia garatada. An â insciö sburlé le recuper al aisciöda 2020, olache ara n’é nia plü jüda.
Sëgn él chësta costelaziun: sce la Federaziun dl palé ti lascia avarëi al Mareo la mesa partida sciöche davagnada, spo él le Mareo che á 22 punc y pó fá le salt tla pröma categoria. Sce nia, spo messará la Federaziun chirí na soluziun por cerne la scuadra davagnadëssa danter Valdaora y Val Badia.
La dezijiun incö a Roma
Inier ai 15 de jügn messâ la Federaziun dl Palé de Südtirol se pronunzié. Chësta n’á indere tut degüna dezijiun y ti á trat le sone cialt – o le palé – a na comisciun a Roma. Chësta s’incunta rodunt incö mertesc ai 16 de jügn. An odará sce y ci dezijiun che la comisciun tol, y sce le Mareo podará trá o manco n cighe por la promoziun a sorpresa tla pröma categoria, ci che foss n vare storich por la uniun. (pablo)
Palé: le Mareo spera y tremorëia
Fej le ASC Mareo le salt tla pröma categoria dl palé? Incö él a Roma le de dla gran dezijiun.
Galaria retrac
View the embedded image gallery online at:
https://www.lausc.it/sport/12875-pale-le-mareo-spera-y-tremoreia#sigProId86dcd3c0b3
https://www.lausc.it/sport/12875-pale-le-mareo-spera-y-tremoreia#sigProId86dcd3c0b3