Seghita l moment negatif del Fascia Balon che sul ciamp de Perjen l’à perdù per 2 a 1. L’endesfida taca sobito mèl per i bec de mister Chelodi che dò cinch menuc i va sot con na ‘papera’ del portier che se lascia slizièr via da la mans n balon scempie che l rodola pian pian te usc. Col passèr di menuc la endesfida vegn jièda tel mez del ciamp con pecia ocajions e nience una mingol pericolousa.
Ti etres carantacinch menuc la musega muda con i fascegn col cortel ti dents a chierir l gol de la parità e i patrons de cèsa chier de no l permeter. Dò 20 menuc i sforc de Trottner e compagnes dèsc fruc e dò na trata dal cianton de Sebastiano Rasom l’é Matteo Lorenz che de cef met l balon junsom l sach. I fascegn seghita a majenèr jech per rebaltèr la partida e dò dotrei ocajions falèdes dai fascegn rua la befa con l gol del 2 a 1 con n contropé di patrons de cèsa che desfruta l sbilanzament di joegn fascegn. I nesc proa dapò a drezèr la endesfida, ma zenza ejit.
Per l moment chesta l’é l’ultima partida, ajache col nef decret amancol fin ai 24 de november no se jiarà più: speron che vae dut ben.
De più en cont a la formazion e a la classifica su La USc 43 di 30 de otober
(Pierpaolo Rasom)
