La Usc di Ladins

Bona neves per l’SG Cortina Hafro: »Da en sabeda ai 31 de otober, zacan la squadra p se arcedèr con duc i jiadores – se lec te n comunicat sul sit ofizièl - l’iter de la carantena l se à serà sù e i atlec, duc ‘negativisé’, i pel endò jir su la giacia per se enjignèr a la pruma partida di 5 de november. La voa de partir endò con la routine de semper la é grana e duc i jiadores farà dut l possibol per troèr la forma dant che l’é meso«.

Chesta l’é zenz’auter na bela neva per la squadra ladina che zacan l’à podù endò se trèr ite i feres: en jebia ai 5 i ampezegn jia sia pruma endesfida tel derby ladin contra i Falcons e al Pranives se sontra Gherdëina e Asiago per la pruma endesfida del Return2Play Games de AHL. Chesta endesfides jirà en scena amò n’outa en sabeda ai 7 al Scola de Dèlba e al Hodegart de Asiago.


En cont di resultac che jà saon enveze, che i revèrda l campionat de IHL, l Fascia l se à prejentà a l’endesfida de Bornech col Pusteria di 31 de otober zenza l’espert defensor Derek Eastman, ampò l’à scomenzà ben sia partida col prum gol de Davide Schiavone. L vantac del Fascia l se à ence smaorà tel prum temp con l gol del 2 a 0 de Joseph Mizzi. La squadra de cèsa, sot de 2 goi l’à aboncont abù na bona reazion, troan la parità che à tegnù per dut l secondo temp. Tel terzo l’é ruà amò n’outa l vantac fascian con Diego Iori, ma nience chest’outa i fascegn é stac bogn de tegnir l resultat. I louves se à vadagnà endò la parità e a 9 seconc da la fin n gran fal del portier fascian Ljung ge à dat l met al pustereis Oberrauch de segnèr l dezisif 4 a 3 a porta veta.

Nia ponts nience per l Gherdëina contra l’Asiago, che con na partida comanèda dal scomenz a la fin l se à portà a cèsa la venta col resultat definitif de 6 a 2 e l se à portà al prum post de la classifica de IHL-Serie A.

De più su La Usc stampèda de vender ai 6 de november 2020.  (Daniele Verra )