La Usc di Ladins

La Copa dl Monn 2020/21 de liösa sön pista naturala á metü man en jöbia cun la pröma gara a Winterleiten tl’Austria, y porta a tira de bunes noeles. Tla categoria dl dopl á davagné Florian Clara da Lungiarü y Patrick Pigneter da Völs, cun le tëmp de 2.10,41. Secundi a 82 centejims i atri südtirolesc Patrick Lambacher y Matthias Lambacher, terzi é gnüs i austriacs Christoph Regensburger y Dominik Holzknecht, destacá indere de 2,34 secunc. Le comentar de Florian Clara do la gara. "Tl dopl él scemplamënter döt che passenëia. I un dër na buna armonia y ince le material é al cënt".
Tl singul á davagné pro i ëi l’austriach Michael Scheikl cun 2.01,83, dan le conazional Christian Schopf a +1,32. Terzo é gnü Patrick Pigneter cun n destach de 1,45. Pro les ëres ciafunse trëi südtirolejes sön podest: Evelin Lanthaler cun 2.04,48, dan Greta Pinggera a +0,87 y Daniela Mittermair a +1,67.
La Copa dl Monn vá inant bele chësc vëndres cun la secunda gara.  (pablo)