La Usc di Ladins

Tel fin de setemèna giusta passà l’é jit en scena la pruma tapa de Copa del Mond de skialp con na garejèda sprint e n vertical a Ponte di Legno endrezèda da l’Adamello Ski Team. A tor pèrt a la competizion l’é stat ence la fascèna Giorgia Felicetti, che dò n 4° post anter le U.23 te la sprint (a un soul secondo dal terzo post) su n percors ért e tecnich, la é stata bona de trefèr n gran resultat tel vertical coret la dì dò, en domenia ai 20.

La proa era n muie senestra, con 15 nazions en jech su n percors lonch 2509 metres e n dislivel de 680, pontan via da Ponte di Legno per ruèr al travert de Corno d’Aola.

La garejèda ge à dit delvers a la squadra talièna, con la venta del trentin Federico Nicolini (23’40”) anter i omegn, ruà al travert dant che Robert Antonioli (+9”) e Davide Magnini (+14”). Tripleta talièna fata amò più rica dai bogn resultac de Andrea Prandi, prum, e Sebastien Guichardaz, terzo, te la categorìa U.23. L’é ruà enveze al 6° post assolut l gherdener Alex Oberbacher, con l temp de 24’16”.

Anter la femenes enveze l’é stat la franzousa Axelle Gachet Mollaret (28’56”) a venjer la garejèda, ma amò la festa talièna é ruèda te la categorìa U.23, olache la cobia Murada-Felicetti se à vadagnà la pruma doi piazes, or e arjent. Al secondo e al terzo post te la categorìa U.20 enveze Samantha Bertolina e n’autra atleta trentina, Lisa Moreschini.

Dò l bon arjent che à avert la sajon de Copa del Mond de l’atleta de Ciampedel Giorgia Felicetti, aon volù domanèr fora sia sensazions.

Gran proa, con la conquista del 16° post assolut a l’arjent te la classifica U.23, a pec seconc dal prum post. Te spetèeste chest resultat?

Dijon che tel vertical me spetèe n bon resultat, sé de poder fèr ence miec. L’é mia spezialità preferida e la era su n percors che me piajea.

L’or te é stat tout da Giulia Murada, compagna de Nazionèla, per demò 10 seconc. Él più sorì o più senester se troèr dedant i “schi-amisc”?

É fat mingol de fadìa al start, ma da mesa gara inant é fat n gran recuperament, ruan a demò 10 seconc da mia compagna: sion n muie amiches, ma canche sion en gara ogneuna vèrda de fèr sie miec e de doventa amiches-rivales… con n gran braciacol al travert.

La sajon é giusta scomenzèda e tu, soraldut anter i U.23, te pes ruèr n muie inant en classifica. Olà te veideste a fin sajon?

Chest an voi pontèr en aut te la classifica generèla U.23 de Copa del Mond e esser en top-forma per i Mondiai de Andorra. Volesse però me miorèr ence te le sprint.

Colun él l proscim apuntament?

Ades sarà i Campionac Taliegn de dute 4 le spezialità e sobito dò doi tapes de Copa del Mond en Svizra e Franzia. Sarà na sajon rica de apuntaments.

Daniele Verra  (Daniele Verra)