La Usc di Ladins

L’aane jà scrit, »Sarà fondamentèl l dopie derby ladin col Cortina«. Na gran pèrt de la calificazion del Fascia a la Final Four de IHL-Serie A la passèa, e amò l’à da passèr, con l’endesfida ladina de contra ai jormegn de Ampez.

L prum round, se coscita podon l chiamèr, l’é jit en scena en sabeda ai 26 al stadie Olimpich, olache la squadra de cèsa vadagnèa amancol un pont da 19 partides de seghit. La 20esima à aboncont ferà chesta statistica, ajache i Falcons é stac bogn de se portèr a cèsa ponts e partida.

La squadra de coach Liberatore, amò zenza Joseph Mizzi te l’atach, l’à jià na partida de orden, da squadra leèda e tegnicia, se portan inant tel prum temp de gra al gol de Leonardo Felicetti e vadagnan amò l dopie vantac tel secondo con la steca de Daniel Tedesco, dant de encassèr l gol del 1 a 2 de Giftopoulos. Tel terzo temp l Fascia à vardà de controlèr l jech e l cronometer, tegnan coscita bon l resultat madurà ti prumes 40” e se portan a cèsa 3 ponts de gran emportanza.

Ades defat la classifica veit l’Asiago prum a 22 ponts, l Renon secondo a 15, l Pusterìa terzo a 14. A 14 ponts se troa ence l Cortina, al moment al quarto e ultim post bon per le Final Four. Con la venta sui jormegn, l Fascia se à aboncont portà al quinto post a quota 10 ponts, ma con amò na scontrèda direta da jièr e na partida en più da cogner recuperèr. I jeghes, ensoma, i é amò averc.

En lunesc ai 28 va inant l’AHL con l’endesfida Fascia-Lubiana al Scola de Dèlba. Sarà amò ence Cortina-Asiago vin Ampez a l'Olimpich  e Gherdëina-Pusterìa al Pranives de Selva.



 (Daniele Verra)