La Usc di Ladins

En lunesc ai 4 de jené se à jià doi partides dassen scombatudes en Alps Hockey League, sessaben semper con n eie su la calificazions a le Final Four de IHL-Serie A. Al Lungo Rienza de Burnech l Pusterìa à batù l’Asiago per 1 a 0, se portan al prum post tant te la classifica de AHL che te chela de IHL. Per chel che vèrda l campionat talian, i venec à aboncont amò da jièr la doi endesfides sburlèdes con Fascia e Cortina e donca i amò la possibilità de comanèr la classifica, ajache l destach dai louves de Pusterìa l’é demò de 4 ponts.

Fascia e Cortina. Apontin la doi ladines se jia l’ultim post bon per l’azess a le Final Four de IHL, l quarto dò Pusterìa, Asiago e Renon. Per endèna la classifica disc Cortina 4° con 15 ponts, Fascia 5° con 13, a parità de partides jièdes, canche en mencia amò demò does (Rittner Baum vs SG Cortina Hafro e Wipptal Broncos Weihenstephan vs Fascia Falcons, ai 6 de jené; SG Cortina Hafro vs Migross Asiago Hockey e Migross Asiago Hockey vs Fascia Falcons, data da defenir).

Chesta la situazion de classifica dò la partida jièda angern al Scola de Dèlba. I Falcons à vedù ruèr sun sia giacia i sudtiroleres del Vipiteno. La partida era de gran emportanza, con l’ocajion fascèna de se portèr a pari ponts col Cortina a quota 15 (e en vantac de gra a la venta te la scontrèdes diretes). Purampò la formazion ladina la no é stata bona de se portèr a cèsa i 3 ponts nec, seran sù i tempes regolamentères sul 3 a 3, dant de perder ai rigores, vadagnan un soul pont en classifica.

Zenza l’infortunà Roland Hofer e con vèlch jiador a mez servije per problemes fisics (Diego Iori, Davide Schiavone) l Fascia à smacà sul portier aversarie Jakob Rabanser. Dò n scomenz senester che à portà la squadra de cèsa sot de 2 goi, i Falcons à jià na partida en crescita. Amò tel prum temp, n gol en PP à portà la partida sul 1 a 2 con Leonardo Felicetti. N auter PP tel secondo temp à dapodò portà l’endesfida en parità de gra al gol de Diego Iori, dant del nef vantac sudtiroler. L terzo temp l’é scomenzà sobito delvers per l Fascia, con Davide Schiavone, partida maraveousa la sia per cantità e calità enceben i problemes a la schena, che à segnà l merità gol del 3 a 3. L Fascia, vadagnèda la neva parità e consapevol de aer l’obligh de venjer, l’à proà l dut per dut tel terzo temp, se troan aboncont dedant n mur con inom Jakob Rabanser. A la fin di 60 menuc regolamentères, la partida à donca vedù i OT e i SO. I rigores ge à dat tinultima rejon ai ghesć, roinan i pians fascegn e smendran la possibilità de azeder a le Final Four. Apuntament ai 6 de jené, canche la situazion palyoff la sarà più chièra. Una ladina sarà te le Final Four, resta da capir coluna. Fascia o Cortina?  (Daniele Verra)