La Usc di Ladins

Caterina Ganz l’é la venjidora de doi garejèdes de Copa Tèlia Gamma. Angern, sabeda ai 9 de jené e anché, domenia ai 10, l’à tout pèrt a doi garejèdes a Cogne: na sprint de tecnica classica e na 10 chilometres individuèla semper a tecnica classica.

En sabeda te la califiches Greta Laurent à passà via la atleta da Moena, ruèda seconda, ma te la finèles Caterina Ganz é stata bona de despassèr la Laurent (duta does de le Fiamme Gialle) e la se à vadagnà coscita la venta. Terzo post per Chiara De Zolt Ponte di CS Carabinieres.

Ma no bèsta, la atleta fascèna se à portà a cèsa ence la venta de la garejèda de anché, la 10 km a tecnica classica col temp de 29’21.40. Destachèda de 42’’90 l’é Stefania Corradini e terza l’é endò Chiara De Zolt Ponte che se conferma la miora de la Under 23.

Per chel che vèrda i ic te la garejèda de en sabeda, la sprint a tecnica classica, l prum post é stat vadagnà da Maicol Rastelli (Eserzit), 2° per Simone Mocellini (Fiamme Gialle) e 3° per Simone Daprà (Fiamme Oro). N auter atlet da Moena, Giovanni Ticcò (Fiamme Oro), se à vadagnà la 6^ posizion. Per i Under 20 l mior temp é stat chel de Matteo Ferrari che é ruà 19°.

Anché te la 15 km a tecnica classica la venta é jita a Dietmar Noeckler (Fiamme Oro) col temp de 39’22.50. Secondo post per Michele Gasperi (Eserzit), mior di U23 e terzo per Stefano Gardener (Carabinieres).     (mci)