La Usc di Ladins

Te chësc invern dassënn öt, fejel plajëi sce valch s’armöi y dá altamo na picia cercia de normalité. Por Al Plan y Plan de Corones él chisc dis le gigant de Copa dl Monn dles ëres, che röia en mertesc ai 26 de jená por le cuarto iade sön la pista "Erta". Do le suzes de publich y d’aprijamënt che les gares á albü tles ediziuns passades, sarára en chësc ann cotan atramënter, zënza jënt söles tribunes y zënza program de cornisc. Döt le staff incër le comité "Al Plan Events" laora indere impó a 360 gra, por lascé garaté ci che stá te sües mans.
"Sambëgn él iniann döt cant plü zite y atramënter, ara vá inant regolara" – dij le presidënt Willi Kastlunger – "Ci che reverda la strotöra é tan co döt arjigné. I rengraziun Chël Bel Dî y sperun che döt vais dl dër vers." Laur él sëgn ciamó da perfezioné la pista, do la nëi tomada tla nöt dla jöbia al vëndres, y la nëi mola tomada tla nöt dal vëndres ala sabeda. 
Ince sce les condiziuns d’organisaziun é particolares, é Kastlunger impó dassënn contënt che les gares vëgn a s’l dé: "I arati che i messunse ester capazi. Al é ince na onú por nos da podëi fá chëstes gares y insciö porté pro ala publizité por le paisc y por le Plan de Corones. Al é öna dles püces poscibilitês che i un da jí fora por le monn tla televijiun. Chësc é val’ de positif".
Insciö aspeton sëgn ert l’evënt sportif che é oramai dan porta. La pröma manche sará da odëi dales 10:30, la secunda dales 13:30. Dal momënt che la jënt ne pó nia pormez tl areal de gara, inviëia Willi Kastlunger da ti ciaré a ciasa: "Trëi agn indôlater éra jüda bun, al é dagnora sté beliscimo y i un tres albü na fortüna mata. Iniann dess la jënt da sté a ciasa y se gode la gara dan televijiun".

T’La Usc di Ladins di 22 de jená podëise lí co che an organisëia l’evënt söl post y ince ciünes che é stades valgünes desfides.  (pablo)