La Usc di Ladins

La sajon nueva ie inò pieda via cun turnoies singui y a scuadres: dai 27 ai 29 de setëmber iel stat n turnoi urmei de tradizion, l Open nternaziunel de Chioggia. Iló à tëut pert Ruben Bernardi. Ël fova l cuinto numinà de na grupa de 27 partezipanc, la grupa A sëura 1850 Elo. Cun 4 sun 5 ponc àl arjont l terzo post, n resultat che l fej scialdi cuntënt.


Casadio pra i campiunac mundiei tl Brasile
L turnoi plu mpurtant de si vita nchinamò ova Niccolò Casadio, ël fova dai 29 de utober ai 11 de nuvëmber ai campiunac mundiei dla junanza a Florianopolis tl Brasile. Tla categuria plu auta sot a i 18 ani fova la cuncurënza sambën scialdi sterscia. Avisa perchël ie i 6 sun 11 ponc n grandiscimo resultat, per chël che duta la lia ti fej i cumplimënc.

La prima partida dl campiunat
De nuvëmber scumëncia, coche uni ann, nce i campiunac pruvinziei a scuadres. L Gherdëina tol pert a chisc campiunac, bele da ani incà for, cun trëi scuadres. La segonda scuadra dl Gherdëina "Gherdëina II" ie l ann passà stata bona de jì su tla prima liga cun si segondo post. Chësta scuadra à pona bele tla prima ancunteda messù jughé propi contra la prima scuadra dl Gherdëina. La ancunteda ie fineda via cun n 6 a 0 sëch per i favoric dla prima scuadra dl Gherdëina cun ponc fac da Stefan Moroder, Rainer Demetz, Ruben Bernardi, Thomas Moroder, Christian Grossi y Josef Demetz.

Per la Lia dal Scioh, Manuel Perathoner

L articul tla edizion atuela de La Usc di Ladins.