La Usc di Ladins

Sion ormai da trei partides tel giron de outa de la pruma fasa del campionat de IhL e do 15 giornèdes vèl la pena veder coluna che l é la indicazions che à dat la squadres. Aon capì che per endèna l é l Caldaro che comana e l fala dassen pech. Jà da timpruma i sudtiroleres i se à portà al prum post en classifica e, enscin ades, sun 15 partides jièdes i n à vent 14, con na soula desfata ruèda ai rigores. 43 donca i ponts. Dedò ai sudtiroleres troon enveze l Aosta, squadra che era pontèda via chest an con l’idea de restèr en aut e coscita la é do che la fèsc. Con cinch ventes te la ultima cinch giornèdes l Aosta proa a tegnir l pas e l cef de la classifica. Per endèna con 37 ponts la pel stèr bel sorì al secondo post. Scì perché l terzo l é a quota 31, olache troon Varese e Feltre coi medemi ponts. Chestes l é la squadres che à dat maor desmostrazion de forza, e ence la soules che à passà via quota 30 ponts. Dapò l é n bel saut per ruèr a la quinta formazion en classifica, l Appian a 24 ponts. Dedò dai Pirates l é n bel grum, con Perjen e Valpellice a 22, Alleghe a 20, Fascia a 18 e Dobbiaco a 16. Resta enveze più endò la trei squadres che les à stentà de più enscin a ades. L Fiem, che per proèr a mudèr sajon l à fat sentèr te panca l fascian Luca Felicetti, l é a 10 ponts. Ultimes Como e Persenon a quota 7.

De più, ence sul setor mender di Fascia Falcons, su La Usc stampèda de en vender ai 29 de november.  (Daniele Verra)