L’é tacà i ejames sierologics

Data

05 de mei 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
I prelieves per troèr la prejenza di anticorpes é peé via a Ciampedel a la prejenza del president de la Provinzia Maurizio Fugatti e del diretor de l’APSS Paolo Bordon.
L’é scomenzà i prelieves per fèr i ejames sierologics che la Provinzia de Trent à programà ti 5 Comuns monitoré del Trentin. A Ciampedel i prelieves de sanch é taché anché da doman, mèrtesc ai 5 de mé, e per l’ocajion l’é ruà te Fascia ence l president Provinzia Maurizio Fugatti e l diretor de l’APSS Paolo Bordon. Dut é stat organisà col didament di Studafech: spartii te cater files e con la distanza de segureza, i sentadins é stac dant domané fora da operatores che ge à consegnà l codesc per fèr l prelief e, a chi che dò i 10 de oril aea abù ence vèlch sintom, ence n auter codesc per fèr l tampon.

I prelieves é stac fac da infermieres del distret de Fascia, didé da studenc del terzo an de infermieristica de Trent e duta la operazion é stata belebon asvelta, enceben che dassen n muie de sentadins i aesse azetà de se sotepor al test.

Te n gloriet de fora l’é stat enveze endrezà la postazion per fèr l tampon, con l diretor del distret de Fascia e Fiem Luca Nardelli, ence chest a titol volontarie e debant.

Fugatti e Bordon, rué a vardèr l scomenz de chesta rilevazion ensema con l conseier provinzièl Luca Guglielmi e l’ombolt de Ciampedel Ivo Bernard, i parea belebon contenc de veder la bona partezipazion, che é stata stimèda sora al 80% di envié.

A duc ge é stat dit che dit che jirà via amancol 60 dis inant che vegne de retorn i resultac, che i vegn luré fora a Roma, e che la resposta sarà da poder lejer tras l sistem FastTreC, desche duc i etres ejames, col codesc che ge é stat consegnà e ge é stat sotrissà che no l’é segur che la prejenza di anticorpes dae la protezion dal Covid, donca duc cognarà ampò sotstèr a la regoles de prevenzion. La rilevazion, che vegn conscidrèda de gran valuta per i studies scientifics, va inant e chisc dis che vegn la vegnarà fata a Cianacei, te la caserma de protezion zivila.

De più su La usc stampèda de vender ai 8 de mé.

 (Lucia Gross)