La Usc di Ladins

Anter la desvaliva domanes del costionèr che l’Apt ge à manà fora ai ghesć scric ite a la newsletter l’era ence chela se chest istà ge piajessa durèr i impianc portamont. L 28% à responet de scì, »descheche l’à semper fat«, l 59% à ence responet de scì ma »l se speta che vegne aplicà la regoles del distanziament sozièl«.

L’é belapontin sun chesta indicazions che da desvaliva setemènes laora i consorzies di impianc portamont de Fascia.

Enstadì l’Anef (la sociazion nazionèla di gestores funiviaries) à manà fora n comunicat per domanèr che l Goern tole en conscidrazion ence chest setor e che vegne prest dezidù canche i impianc portamont podarà endò orir.

»I impianc portamont l’é l motor de na filiera emportanta - scrif la presidenta de l’Anef Valeria Ghezzi - che te val é fata da albergatores, boteghieres, maestres de schi, menacrepes e restoranc e sa mont la ge dèsc lurier a refuges e personal e chest crea n prozess virtuous con benefizies per la sozietà e per l Stat. Aon prescia de orir e desmostrèr che, con la giusta precauzions, i impianc pel vegnir duré jà chest istà ajache i garantesc n trasport segur pe duc.«

Anef ge à metù dant al Goern na lingia de proponetes de regoles per garantir la segureza di lurieranc e di utenc. »Descheche se à podù veder al scomenz de l’emergenza sanitèra - disc l’Anef - smendrèr l numer de utenc che monta duc ensema sui impianc no l’é efizient e no l porta a schivèr coudes, alincontra la jent cogn stèr più al lonch a spetèr e donca con maor risech de stèr apede e soraldut se la cogn spetèr daìte e zenza despositives de segureza.«

La scelta de Anef l’é donca chela de balanzèr la jent con la portèda de l’impiant per favorir che la jent sie semper en moviment e mai en couda. Anter la mesures de segureza l’é l’obligh de distanza de amancol 1 metro sun dut l percors (dal piaz per i auti, a la cassa, a l’azess a l’impiant), de aer semper l couribocia e la maneces. Sarà de obligh ge fèr semper ciapèr aria a la cabines e les dejenfetèr.

Co se èi pa endrezà i impianc portamont te Fascia e soraldut can verjarèi? Ge l’aon domanà a Daniele Dezulian, president del Consorzie di impianc portamont de Fascia e Ciareja e conseier de l’Anef.

De più su La Usc stampèda de vender ai 15 de mé 2020.

 (Monica Cigolla)