La Usc di Ladins

Con en lunesc ai 18 de mé se pel endò jir a messa te gejia, ma en numer limità e a distanza. Couribocia obligatorie, nia più èga sènta per se fèr l segn de la crousc, gel apena ite da usc per se igienisèr la mans e indicazions sui benc che moscia olache l’é da se sentèr jù, un o mascimo doi persones per banch. E nia più Cor che compagna la zelebrazions.

La linees guida per zelebrèr en segureza al temp del coronavirus é states dates fora col protocol sotescrit da la Cei e dal goern Conte ai 7 de mé, ma l’atuazion concreta de la desposizion é responsabilità de piscopes e paroches che chisc dis passé à chierì de meter jù i vademecum con la indicazions per ogne comunità. L’é la endesfida de la fasa 2 de la Gejia taliana.

Ence i preves de Fascia se à dat jù chesta setemèna per meter jù la normes per ogne parochia.

Se trata de na partenza graduala, ge tegn a sotlineèr don Andrea Malfatti, percheche nia sarà più desche inant.

Co ve aede endrezà con la messes te la gejies?
Don Andrea Malfatti: Tel protocol di 7 de mé l’é ite na lingia de norme che se cogn respetar, la strutura de nosce gejie no ne consent de jir fora da cheste indicazion. Per chel che varda mie gejie: a Soraga e a Sèn Jan no podarà jir ite più che 60 persone, a Poza e Pera no più che 90. Sun usc sarà i volontadives che se cruziarà de controlar l numer de jent che va ite. I oraries de le messe, che se pel troar taché fora sun ogne usc de gejia e ence sul sit www.decanatodifassa.it é indicatives e provisories, l’é n esperiment che vegn fat e che pel mudar ogne moment. Ge racomane ai fidei, en segn de responsabilità e de comunion, l respet de le indicazion. Endana scomenzon e vedon co far. L’é emportant aboncont che se saesse che la pastorala desche inant no la sarà più. Verjon le gejie per le messe ma autres momenc de orazion no se pel i far te chest moment, desche per ejempie l rosar da le 8 da sera.

Donca na familia no pelela stèr duta ensema te n banch?
Na, aon gejie massa picole con benc taché, no tant distanzié e per respetar le distanze ence na familia la cogn se spartir. Cognon capir ence noi chesta neva situazion e veder coche la va, vivon ensema chesta esperienza, l’é per duc na novità.

De più su La Usc stampèda de vender ai 22 de mé 2020.

 (Monica Cigolla)