Chesta setemèna rua la letres te duta la cèses. Pel fèr l test chi che à più che 14 egn, l costa 32 euro.
I tacarà ite la setemèna che vegn, fazile ai 27 o 28 de mé, i test sierologics per i sentadins de Mazin, Sèn Jan, Soraga e Moena. La letra de comunicazion ruarà te la cèses di sentadins chisc dis che vegn. Chi che vel fèr l test cogn scriver ite l formulèr e l consegnèr dant da en vender ai 22 de mé te la casseta fora da Comun o l manèr per mail. Pel fèr l test duc chi che à più che 14 egn, chi de mendra età col consens di genitores, l costa 32 euro a persona che cogn vegnir paé al moment de la prestazion. L’analisa vegnarà fata dai esperc del Grop Synlab.
»Se trata - à dit l conseier de procura a la sanità Gianluigi De Sirena - de n grop european de diagnostica medica che travers n prelief del sanch da
la vena l verifica la prejenza de anticorpes anti Sars-CoV2 indicatores che se é vegnui a contat col virus. Te chest moment la scienza no la é bona de stabelir se la prejenza de chisc anticorpes defen da l’infezion, donca ge vel semper respetèr duta la regoles, soraldut la distanza. Cherdon aboncont che chesta analisa sie de utol per poder pontèr via endodanef - à jontà apede De Sirena - e per chest aon lurà con gaissa, en strenta colaborazion con la procuradora Elena Testor, i ombolc e col didament del vize ombolt de Mazin Fausto Castelnuovo, per ge sporjer ai sentadins la possibilità de fèr l test e aer i resultac te pech temp«. Defat l Grop Synlab consegnarà i resultac te presciapech trei dis diretamenter a l’enteressà. La persones che sarà positives arà l met de fèr n auter test te cater meisc. La setemèna che vegn chi che à dat jù sia adejion ciaparà comunicazion del dì e l post olache vegn fat l test. Chiò i cogn se prejentèr con document de identità e i cognarà scriver ite l formulèr per la privacy. I test jirà inant per presciapech 11 dis.
(Monica Cigolla)
