La Usc di Ladins

Endèna l temp de pandemìa duta la boteighes à cognù restèr serèdes e chest à pesà trop sul setor del comerz, soraldut per chela pìcola aziendes che no à podù se enjignèr n sistem per vener online.

Per ge jir encontra l conseier de procura a l’economìa e l comerz del Comun general de Fascia Matteo Iori à metù a jir l grop de lurier »Boteighes de Fascia« tolan sù proponetes e idees. Amò a la fin de oril l’era stat metù sun desch la proponeta de endrezèr dotrei »giornèdes per jir a proveder« te cheles che la boteiga ge sporc a si clienc na zedola/coupon da poder spener te la medema boteiga n trat de temp dò. La proponeta é stata touta sù con gaissa da na trentina de boteghieres de duta la val e coscita l’idea se à concretisà.

En sabeda ai 30 de mé se tegnarà te Fascia la pruma giornèda »Proveder te Fascia - Ge compre te mia val« na scomenzadiva del Comun general de Fascia.

Te chesta giornèda a spener amancol 20 euro se ciaparà na zedola del valor del 20% de chel che se à spenù da poder durèr per autra speises te la medema boteiga. Chest se spera che engaisse la jent a jir a proveder no demò ai 30 de mé ma ence na seconda outa per se emprevaler de la zedola. Tel regolament che ge é stat manà ai boteghieres l’é pervedù che ogne un posse mìngol l mudèr aldò de sia carateristiches, per ejempie te na boteiga del pan no fossa sorì ruèr a spener amancol 20 euro. I inomes de la boteighes che tol pèrt al projet se pel i troèr su la piata Facebook del Comun general de Fascia.

De più su La Usc stampèda de vender ai 22 de mé 2020.

 (mci)