La Usc di Ladins

Vegnarà fat lurieres te l’impiant Gianmario Scola de Dèlba. L stadie de la giacia fat sù ti egn '80 a Dèlba per ge dèr maor luster al storich sport de l'hockey te Fascia, nasciù dant avert e corì pec egn più tèrt, l'é stat man a man miorà ti egn e via per chest istà vegnarà fat de etres lurieres laìte.

Coscita à dit fora la jonta de comun de Cianacei, che l'à apontin formalisà i lurieres de manutenzion straordenèra a la strutura. Più avisa, vegnarà fat da nef i celores e i fons di deregoladoes, vegnarà depent, miorà na pèrt di cesci, fat n nef usc de azess ai ofizies da la pèrt de la Veisc e metù doi portons de azess alóda la rolba, olache vegnarà ence metù a post l fon. 

Chisc intervenc, programé jà da temp, via per l'istà i vegnarà touc dant ence de gra ai finanziaments del fondo strategich del Comun general, fondi che l comun de Cianacei cogn durèr sù apaltan e metan a jir n'opera dant de la fin del 2020, acioche chisc finanziaments i no sie sotmetui a revijion.

Apede ai lurieres che jà aon dit, vegnarà amò metù a jir n intervent de renovament con la realisazion de na strutura per stèr a sosta apede a la casses e a l'usc maester, con amò l colocament de »tornelli« per contèr la persones che va ite e vèlch auter intervent.

Per l projet ge é stat dat sù l'encèria su la basa del preventif prejentà ai 5 de firé al studie del geometra Mariano Cloch de Cianacei.

De più su La Usc stampèda de vender ai 22 de mé 2020.  (Daniele Verra)